ბაქო–თბილისი–ყარსის რკინიგზის მშენებლობაში ჩართული მუშები კუთვნილი ხელფასების მიღების მოთხოვნით გაიფიცნენ. როგორც გაფიცული მუშები აცხადებენ მათ ორი წლის განმავლობაში ხელფასი არ აუღიათ. ხელფასის არგაცემის პასუხისმგებლობას მუშები აზერბაიჯანულ სამშენებლო ფირმებს „ფარეხ“ და „ჯი-ეს გრუპ“-ს აკისრებენ.
გაფიცულების თქმით ხელფასების დროულად გაცემის მოთხოვნით მათ არაერთხელ მიმართეს სამშენებლო კომპანიებისათვის, მაგრამ ამაოდ. ხელფასების გაცემის დაპირება კომპანიებმა დღემდე არ შეასრულეს. 50–მდე გაფიცულმა ეცადა მშენებარე რკინიგზის გადაკეტვა, მაგრამ სამართალდამცველებმა გაფიცულებს ამის შესაძლებლობა არ მისცეს.
დილით, როდესაც გაფიცულებთან ადგილობრივი მედია–საშუალებების წარმომადგენლები მივიდნენ, მუშებმა აზერბაიჯანული კომპანიის წარმომადგენლებთან შეხვედრა მოითხოვეს, საჯაროდ გამოთქმულ ამ მოთხოვნას მხოლოდ ერთი კომპანიის, „ფარეხ“-ის წარმომადგენლები გამოეხმაურნენ. „ჯი ეს გრუპ“-მა კი გაფიცულებთან შესახვედრად საკუთარი წარმომადგენელი არ მიავლინა.
როგორც კომპანია „ფარეხ“-ის წარმომადგენელმა განაცხადა – მის კომპანიას ხელფასების გაცემასთან არანაირი კავშირი არ აქვს, ვინაიდან მუშები სამსახურში მეორე კომპანიამ– „ჯი ეს გრუპ“-მა აიყვანა და შესაბამისად სწორედ ის არის იურიდიული დამსაქმებელი.
შევახსენებთ მკითხველს, რომ ბაქო–თბილისი–ყარსი რკინიგზის მშენებლობაზე ქვეყნის სხვადასხვა რეგიონებიდან ჩამოსული ასობით ადამიანია დასაქმებული. დასაქმებულებიდან 60–ზე მეტს ორი წლის განმავლობაში ხელფასი მიღებული არ აქვთ. გაფიცულების თქმით ისინი მანამდე გააგრძელებენ გაფიცვას, სანამ სამშენებლო კომპანია არ შეასრულებს თავის ვალდებულებას და სახელფასო დავალიანებას არ დაფარავს.
წყარო: http://armenian-community.ge