ევროკავშირი საქართველოს 27 მილიონ ევროს გამოუყოფს სამუშაო ადგილების ბაზრის მართვის და განათლებისა და ბაზრის საჭიროებებს შორის კავშირის გაუმჯობესების მიზნით.
დაფინანსება აღმოსავლეთ პარტნიორობის ინტეგრაციის და თანამშრომლობის პროგრამის ფარგლებში გამოიყოფა.
დამატებითი რესურსების გამოყოფა ხდება აღმოსავლეთ პარტნიორობის იმ ქვეყნებისთვის, რომლებიც უფრო მეტ რეფორმებს ახორციელებენ დემოკრატიის თვალსაზრისით. ეს პროცესი 2012 წელს დაწყებული პროგრამის ფარგლებში მიმდინარეობს.
იგივე პროგრამის ფარგლებში მოლდოვამ 35 მილიონი ევრო, ხოლო სომხეთმა 25 მილიონი ევრო მიიღო.
შარშან მოლდოვამ 28 მილიონი ევრო, საქართველომ 22 მილიონი ევრო, ხოლო სომხეთმა 15 მილიონი ევრო მიიღო.
გაფართოებისა და ევროპული სამეზობლო პოლიტიკის საკითხებში ევროკომისარის შტეფან ფულეს განცხადებით:
„წელს სამი აღმოსავლელი პარტნიორი დაჯილდოვდა თავიანთი ძალისხმევისთვის დემოკრატიული გარდატეხის და ფუნდამენტური თავისუფლებების მიმართ ერთგულების გამო. ვიმედოვნებთ, რომ ეს ჯგუფი მომავალში კიდევ უფრო გაიზრდება“.