საქართველოში ერთ-ერთ მნიშვნელოვან კანონშემოქმედებით პროდუქტად შეფასებულია კანონი თვითმმართველობის შესახებ. ამ კანონთან დაკავშირებით ძირითადი აგრესია როგორც საპარლამენტო, ასევე არასაპარლამენტო ოპოზიციის მხრიდან რატომღაც ,,რესპუბლიკური პარტიის“ მისამართით გამოიხატება. ამასთან დაკავშირებით ,,რესპუბლიკური პარტიის“ წევრს და პარლამენტის აგრარული კომიტეტის თავმჯდომარეს, გიგლა აგულაშვილს psnews.ge-მ კომენტარი სთხოვა.
გიგლა აგულაშვილი:
„ობიექტურობა მოითხოვს, ითქვას, რომ "რესპებს" არა მარტო ეს კანონი "ბრალდება". კანონპროექტის შემუშავების ხანგრძლივ გზაზე ბევრმა ადამიანმა მიიღო მონაწილეობა. დაუმსახურებელი იქნება, მხოლოდ რესპუბლიკელებმა მივიწეროთ ის სიკეთეები, რაც ამ კანონპროექტის მიღებითაა მოსალოდნელი. ისიც უნდა ითქვას, რომ 90-იანი წლებიდან მოყოლებული, საარჩევნოდ ყველა ჰპირდება ამომრჩეველს რეალურ თვითმმართველობას, არჩევნების მეორე დღიდან კი უარს ამბობს დანაპირების შესრულებაზე.
თვითმმართველობის ხარჯზე ცენტრალური ხელისუფლების ძლიერი ვერტიკალის გაძლიერება არა მარტო საარჩევნო დანაპირებზე უარის თქმაა, ესაა უნდობლობა და გაუცხოება საკუთარ მოქალაქეებთან, მომხმარებლური დამოკიდებულება მათ მიმართ. ასეთი პროცესები არ ახალისებს პასუხისმგებლიანი, თავის ქვეყანაზე მზრუნველი ამომრჩევლის ჩამოყალიბებას...
თუმცა დავუბრუნდეთ კითხვას, რატომ ,,ბრალდება“ რესპუბლიკელებს თვითმმართველობის კანონპროექტის შექმნა. ვფიქრობ, "ბრალდებებს" კვებავს ის გარემოება, რომ ჩვენ არ გავურბივართ ჩვენი შეხედულებების გამოხატვასა და დაცვას; ვცდილობთ, არ ვიყოთ კონფორმისტები; პრინციპების ერთგულები ვართ და გულწრფელად გვჯერა, ჩვენი საქმეები ქვეყანას წაადგება, მიუხედავად იმისა, დღეს ვინ გაგთათხავს და თავს ლაფს დაგასხამს.
ისე არ მინდა გამიგოთ, თითქოს მხოლოდ გარეთ ვეძებდე პრობლემას. აუცილებლად გვჭირდება მეტი კომუნიკაცია ხალხთან, მეტი ინფორმირება, მეტი დიალოგი. მეტი ინფორმაცია ხალხს! ეს ჩვენი განვითარების სტრატეგიული გეგმის ერთ-ერთი ძირითადი კომპონენტია.“