ქუთაისის მერის მოვალეობის შემსრულებელი შოთა მურღულია დღეს მერიის ადმინისტრაციული შენობის წინ გამართულ აქციას გამოეხმაურა.
„ყველას შეუძლია თავისი პროტესტი გამოთქვას, მთავარია კანონი არ დაარღვიონ. მე აუცილებლად განვიხილავ რა პრობლემები აქვთ მათ. რაც შეეხება კომისიის შედეგების გაუქმების შესახებ მოთხოვნას, რადგან ამხელა პროტესტია საზოგადოების მხრიდან, შესწავლას საჭიროებს ეს საკითხი რამდენად სამართლიანია ამ ადამიანების პროტესტი, რადგან კონკურსის შედეგად შერჩეულებმა უნდა იმუშავონ ჩემთან ერთად და ცხადია მაინტერესებს მათი პროფესიონალიზმის დონე“,-განაცხადა შოთა მურღულიამ.
შეგახსენებთ, რომ მერიის წინ არასამთავრობოების მიერ გამართულ აქციაზე, რომელსაც საკრებულოს ფრაქცია „ქართული ოცნების“ დეპუტატებიც შეუერთდნენ, აქტივისტებმა მერიაში გამოცხადებული კონკურსის შედეგების გაუქმება და კომისიის დაშლა მოითხოვეს.