ინფრასტრუქტურის მინისტრის ყოფილი  მოადგილე შოთა მურღულია ქუთაისის  ვიცე-მერის პოსტზე   დაინიშნა და მერის მოვალეობასაც შეითავსებს, თუმცა, ადგილობრივ თვითმმართველობაში მას უკვე ქალაქის ახალ მერს უწოდებენ.

მერღულიას მერად დანიშვნა საზოგადოებას უკვე მიულოცა ყოფილმა ვიცე-მერმა თენგიზ თოფურიძემ, რომელმაც მერის მოადგილის პოსტი უკვე დატოვა.

„მინდა, მოგილოცოთ ახალი მერის, ბატონ შოთა მურღულიას დანიშვნა. ყველა ინფრსატრუქტურული პროექტი, რაც ქუთაისში ბოლო პერიოდში განხორცილედა, უშუალოდ მისი  ინიცირებული იყო“,-განაცხადა თენგიზ თოფურიძემ.

მურღულიას ქალაქის მერს უწოდებს ქუთაისის საკრებულოს საკონკურსო-საატესტაციო კომისიის თავმჯდომარის მოადგილე მამუკა მღვდელაძეც.

„დიახ, მურღულია იქნება  ქალაქის მერი,“-აცხადებს მღვდელაძე, რომელიც იმ კომისიის შემადგენლობაშია, რომელმაც ქალაქის მერის  პოსტზე შესარჩევი კონკურსი უნდა გამოაცხადოს.

აღსანიშნავია, რომ მამუკა მვდელაძემ  მერის შესარჩევ კონკურსს psnews.ge -სთან საუბარში ფორმალური უწოდა და განაცხადა, რომ კომისია მაინც იმ კანდიდატს აირჩევს, ვინც ცენტრალური ხელისუფლების მიერ იქნება მხარდაჭერილი.

მერის შესარჩევი კონკურსი, სავარაუდოდ, თვის ბოლოს გამოცხადდება.