ნატოს გენერალურმა მდივანმა ანდერს ფოგ რასმუსენმა განაცხადა 10 ოქტომბერს, რომ იგი იმედოვნებს, რომ საქართველოს სამხედრო ძალები ნატოს სწრაფი რეაგირების ძალებს 2015 წელს შეუერთდებიან.
„საქართველომ შემოგვთავაზა სწრაფი რეაგირების ძალებში ჩართვა მომავალში და ჩვენ დავთანხმდით. ამიტომ, ვიმედოვნებ, რომ ქართული სამხედრო ძალები სწრაფი რეაგირების ძალებს 2015 წელს შეუერთდებიან“, – განაცხადა რასმუსენმა და დასძინა, რომ ეს პირველი შემთხვევაა, როდესაც „საქართველო ნატოს სწრაფი რეაგირების ჯგუფს უერთდება“.
მან ეს განცხადება თავის გახსნით სიტყვაში გააკეთა ყოველთვიურ პრესკონფერენციაზე, როდესაც ნატოს არაწევრ და პარტნიორ სახელმწიფოებთან ალიანსის თანამშრომლობაზე საუბრობდა.
საქართველოს თავდაცვის მინისტრმა ირაკლი ალასანიამ განაცხადა აგვისტოში, რომ ჩრდილოეთ ატლანტიკურ საბჭოს უკვე გადაწყვეტილი აქვს 2015 წელს საქართველოს ჩართვა ნატოს რეაგირების ძალებში; მისი თქმით, ეს გადაწყვეტილება „თავისთავად მეტყველებს იმაზე, თუ რამდენად ღირებულად მიიჩნევენ ქართულ ჯარს და საქართველოს თავდაცვის სისტემას“.