ხაიშის თემის მოსახლეობა უკვე, თითქმის 30 წელია, ხუდონჰესის პროექტის წინააღმდეგ იბრძვის. ჰესი, რომლის აშენება ჯერ კიდევ 80-იან წლებში დაიგეგმა და მას შემდეგ მოსახლეობის წინააღმდეგობისა და სხვა მიზეზების გამო რამდენჯერმე შეჩერდა. დღეს ჰესის მშენებლობის განახლებას ინვესტორი კომპანია, "ტრანსელექტრიკა" გეგმავს. 17 სექტემბერს კომპანიის წარმომადგენლები ხაიშში, მოსახლეობასთან მოსალაპარაკებლად ჩავიდნენ, რასაც ადგილობრივები საპროტესტო აქციით შეხვდნენ.
ხაიშის სკოლაში დილიდან აგროვებდნენ ხელმოწერებს ხუდონჰესის მშენებლობის წინააღმდეგ. ხაიშის მოსახლეობა ფიცს დებს, რომ ხაიშის წმინდა გიორგის მოქმედი ტაძარის, სასაფლოების, ხაიშის თემის და მასში შემავალი სოფლების დატბორვას არ დაუშვებენ.
ხუდონჰესის მშენებლობა 80-იან წლებში დაიწყო და დამბის ნაწილისა და რამდენიმე გვირაბის აშენება მოესწრო.
საქართველოს პრემიერ-მინისტრმა, ბიძინა ივანიშვილმა აღნიშნა, რომ თუ საჭირო გახდებოდა, თავად ავიდოდა ხაიშში.
მთავრობისა და ინვესტორი კომპანიის წარმომადგენლები სოფლის მოსახლეობას მოლაპარაკებას სთავაზობდნენ, მაგრამ ხაიშელებისათვის ერთადერთი მისაღები ვარიანტი ჰესის პროექტის შეჩერებაა.