ქუთაისის ვიცე-მერის პოსტზე განსახილველ კანდიდატთა რაოდენობა უკვე ცნობილია. მერიის საკონკუროს-საატესტაციო კომისია დღევანდელ სხდომაზე იმ კანდიდატების დოკუმენტაციებს განიხილავს, რომლებიც პირველი ეტაპის შედეგად შეირჩნენ. ვიცე-მერობისთვის სულ 10 კანდიდატი იბრძოლებს, მათ შორის მოქმედი ვიცე-მერებიც არიან, გარდა ნიკო კაჭკაჭიშვილისა.
როგორც კომისიაში ამბობენ, გასაუბრების ეტაპზე ბევრი კანდიდატი ვერ გადავა, რადგან აპლიკანტთა დიდმა ნაწილმა არასრულყოფილი დოკუმენტაცია წარმოადგინა.
„დღეს განვიხილავთ ვიცე-მერობის შერჩეული კანდიდატების დოკუმენტაციებს. ეტაპობრივად მივყვებით და, ალბათ, ათი დღის ვადაში დავასრულებთ პროცესს,"- ამბობს ქუთაისის მერიის საკონკურსო-საატესტაციო კომისიის თავმჯდომარის მოადგილე მამუკა მღვდელაძე.
კომისიაში სულ 1291 განაცხადია შესული. კონკურსის პირველ ეტაპზე ვაკანტურად 48 თანამდებობა გამოცხადდა.