საპარლამენტო არჩევნებზე „ლეიბორისტულმა პარტიამ“ ქუთაისის მაჟორიტარ კანდიდატად ადგილობრივი საქალაქო ორგანიზაციის თავჯდომარე სამსონ გუგავა დაასახელა. მაჟორიტარი კანდიდატი პარტიის ლიდერმა შალვა ნათელაშვილმა ოპერის თეატრში შეკრებილ საზოგადოებას წარუდგინა.
„დარწმუნებული ვარ, რომ სწორედ ჩემი ქუთაისი და ჩემი იმერეთი დაადებს პოლიტიკურ საფლავზე დღევანდელ რეჟიმს პირველ დიდ ქვას, ხოლო, თუ ჩვენ მოვალთ ხელისუფლებაში, ეს რეჟიმი, გარდა წასვლისა, კაბინეტებიდან აუცილებლად გადავა თავისივე აშენებულ გლდანის ციხეში. დარწმუნებული ვარ, ჩვენი იმერეთი და ქუთაისი ამაში მხარს დაგვიჭერენ.“ - განაცხადა შალვა ნათელაშვილმა.
ლეიბორისტები მთავარ კონკურენტად „ქვეყნის სიმდიდრის მიმთვისებელ მტაცებელ ხროვას“ მიიჩნევენ, რომლებიც, მათივე თქმით, „დღეს შეიძლება ცალკე ჯგუფებად არიან დაყოფილი, მაგრამ არ იცვლება მათი მგლური ბუნება“.
ოპერის თეატრში პარტიის ლიდერმა სამოქმედო გეგმაც წარადგინა, რომელშიც მთავარი პრიორიტეტი სოფლის მეურნეობას, დასაქმებას და განათლებას ეთმობა.
მირიან ბერულავა