რამდენიმე თვის წინ წყალტუბოს რაიონის სოფელ ბანოჯაში მცხოვრებმა, 19 წლის ბესიკ ზვიადაძემ საკუთარ ეზოში კარსტული მღვიმე იპოვა. როგორც სპეციალისტები ვარაუდობენ, მღვიმე სამი კილომეტრის სიგრძისაა და უნიკალური სტალაგმიტებით გამოირჩევა.
ამ დღეებში ბესიკ ზვიადაძეს შინ ვესტუმრეთ და მის ეზოში ვისაუბრეთ მღვიმეზე, რომელიც, შესაძლებელია, უახლოეს მომავალში ექსტრემის მოყვარული ტურისტებისთვის მიმზიდველ სანახაობად იქცეს.
ბესიკ ზვიადაძე, მღვიმის აღმომჩენი ახალგაზრდა: „ნამდვილად არ მეგონა, ჩემს ეზოში მღვიმეს თუ აღმოვაჩენდი. ამ ადგილას წყარო იყო, არავის აზრადაც არ მოსვლია, თუ რა იმალებოდა ქვაბულში. იქ წყლის დასალევად ჩემი ოჯახის წევრები და მეზობლები ხშირად მიდიოდნენ, მაგრამ მის სიღრმეში შესვლას ვერავინ ბედავდა. ერთხელ გადავწყვიტე, შევსულიყავი მღვიმეში. მეზობლის ბავშვები შესასვლელთან დავტოვე, მე კი ფანარი წავიღე და სიღრმისკენ დავეშვი. თავიდან ქვაბულში ხოხვით შევედი, მერე ჩვეულებრივად, ფეხით გავაგრძელე გზა. ზოგ ადგილას მღვიმის სიმაღლე 10 და 15 მეტრია. მღვიმეში გიწევს დიდ ქვებზე სიარული და წყალში ცურვაც. ანუ, შიგნით ექსტრემალური პირობებია. მღვიმე, დაახლოებით, 3 კილომეტრის სიგრძისაა (აქამდე ვართ ნამყოფი), შიგნით მრავალი სახეობის ბრწყინვალე სტალაგმიტებია. გარდა ამისა, ყვავილები და პატარა, გამჭვირვალე თევზები აღმოვაჩინეთ. ზოგიერთი სტალაგმიტი ორი მეტრის სიგრძისაა. მღვიმეში ისეთი სილამაზეა, გეგონებათ, იქაურობა დათოვლილიაო.
ჩემი ნათესავის მეზობელი ტელეკომპანია „მაესტროს“ ჟურნალისტია. მან ჩემი აღმოჩენილი მღვიმის შესახებ ჟურნალისტს უამბო. სამი კვირის წინ „მაესტროს“ გადამღები ჯგუფი აქ იმყოფებოდა, მერე „პირველი არხი“ მოვიდა, ხუთი დღის წინ კი ტელეკომპანია „იმედის“ გადაცემისათვის „სპეციალური რეპორტაჟის“ სიუჟეტი მოამზადეს. ასე რომ, ინფორმაცია მალე გავრცელდა. ჯერჯერობით, ხელისუფლების მხრიდან არანაირი გამოხმაურება ყოფილა. იმედია, ახალი აღმოჩენით ხელისუფლება დაინტერესდება და მღვიმეს მიხედავენ. გასულ კვირას ქუთაისიდან პროფესორი ირაკლი ჯულაყიძე იყო მოსული. მისი თქმით, აქ წყლის მიერ გამორეცხილი მღვიმეა. მსგავსი სტალაგმიტები „პრომეთეს“ მღვიმეშიც არის, მაგრამ ეს ნამდვილად სჯობს. ხოლო სათაფლიის მღვიმეში კი მსგავსი სილამაზე არ არის. ეს მღვიმე არის ექსტრემის მოყვარულებისთვის საუკეთესო სანახაობაო. ის დაგვპირდა, თბილისიდან სპეციალისტებს ჩამოვიყვანთ და მღვიმეს შევისწავლითო. ვნახოთ, რა იქნება. თუ აქაურობა გააკეთეს, ჩვენს კუთხეში ტურისტების რაოდენობა გაიზრდება. ძალიან მიხარია, რომ ახალი მღვიმე აღმოვაჩინე. აქ სათაფლიის მღვიმის დირექტორიც იყო მოსული. მან მითხრა, ტრენინგებს გაივლი და გიდის თანამდებობაზე გაგამწესებთო. ხელისუფლების ძალიან დიდი იმედი მაქვს. კარგი იქნება, თუ მიხედავენ ჩემს მიერ აღმოჩენილ მღვიმეს.“
მურმან ზვიადაძე, ბესიკ ზვიადაძის მამა: „ამ დასახლებას ქვაბული ჰქვია, აქ ხუთი საუკუნის წინ დასახლდნენ ჩემი წინაპრები. ამ გამოქვაბულით არც მე და არც მამაჩემის თაობა არასოდეს დაინტერესებულა. უბრალოდ, წყლის დასალევად თუ ჩავიდოდით ხოლმე, ქვაბულს ყურადღებასაც კი არავინ აქცევდა. აგერ, რამდენიმე თვის წინ, ჩემმა შვილმა აღმოაჩინა და დიდი იმედი მაქვს, რომ აქაურობას ხელისუფლება მიხედავს.
მინდა გითხრათ, რომ ჩემი ოჯახი სოციალურად დაუცველია. ჩემი ერთი შვილი ბელორუსიაში წავიდა, რომ საკუთარი თავი ირჩინოს. ჩვენ კი დედაჩემის პენსიით ვირჩენთ თავს. 51 წლის კაცი ვარ, პროფესიონალი მძღოლი და სამსახური ვერ ვიშოვე. სადაც მივედი, ყველგან დამიწუნეს, ყველგან ახალგაზრდებს ეძებენ. სახლი ავარიულ მდგომარეობაში მაქვს, მეშინია, თავზე არ ჩამომენგრეს. შვილო, იმას ვიტყოდი, რომ იქნებ ხელისუფლებამ მიხედოს ჯერ მღვიმეს და მერე - ჩვენ.“
მღვიმიდან გამოტანილი ვიდეოებისა და ფოტოსურათების მიხედვით, ახლადაღმოჩენილი კარსტი მართლაც ფანტასტიკური სილამაზისაა. ახლა ჯერი ხელისუფლებაზეა.