ქუთაისთან ახლოს, ჭომის და გუმათის უბნების მახლობლად, წყალტუბოს რაიონის სოფელ ჯიმასტაროში, 4-5 ჰექტარი ტყე დაიწვა. ხანძარი 12 დეკემბერს გაჩნდა, დასახლებული პუნქტიდან 1,5 კილომეტრის მოშორებით. იმერეთის საგანგებო სიტუაციების შტაბის რაზმმა და მეხანძრეებმა ხანძრის ლოკალიზება დროულად შეძლეს. ძლიერი ქარის გამო, არსებობდა საშიშროება, რომ ცეცხლი ადვილად გადასულიყო დასახლებულ ტერიტორიაზე, თუმცა მისი ჩაქრობა ადგილობრივ მოსახლეობასთან ერთად ადვილად მოხერხდა. სავარაუდოდ, ხანძარი დაუდევრობამ გამოიწვია.