„მოქალაქეთა პოლიტიკური გაერთიანების შესახებ“ ორგანულ კანონში განხორციელებულ ცვლილებებთან დაკავშირებით „სამართლიანი არჩევნებისა და დემოკრატიის საერთაშორისო საზოგადოებამ“ (ISFED), საქართველოს ახალგაზრდა იურისტთა ასოციაციასთან პარტნიორობით, მრგვალი მაგიდა გამართა. შეხვედრას ადგილობრივი თვითმმართველობის, პოლიტიკური პარტიების, არასამთავრობო ორგანიზაციების, მედიის წარმომადგენლები და მოქალაქეები ესწრებოდნენ.
ორგანიზაციებს მიაჩნიათ, რომ „მოქალაქეთა პოლიტიკური გაერთიანების შესახებ“ საქართველოს ორგანულ კანონში და სისხლის სამართლის კოდექსში 2011 წლის დეკემბერში განხორციელებული ცვლილებები საფრთხეს უქმნის გამოხატვისა და საკუთრების უფლებებს და აქვს სამოქალაქო-პოლიტიკური აქტივობების შემზღუდველი ეფექტი, ასევე ქმნის არათანასწორ საარჩევნო გარემოს. კანონით დაწესებული შეზღუდვები ხშირ შემთხვევაში არაგონივრულია, ხოლო სანქციები - არაპროპორციული.