დასახელება: „ვეფხისტყაოსანი“ (ყველაფერი „ვეფხისტყაოსნის“ შესახებ) ხუთ წიგნად
პროექტი: ჩვენ და „ვეფხისტყაოსანი“
ფასი: 399,95 ლარი
წიგნი „პირველი - „ვეფხისტყაოსნის“ გამოცემათა რაოდენობამ ქართულ ენაზე ასს გადააჭარბა. ეს გამოცემა მნიშვნელოვანია იმით, რომ იგი გამოსაცემად მოამზადა საქართველოს მეცნიერებათა აკადემიის „ვეფხისტყაოსნის“ აკადემიური ტექსტის დამდგენელმა კომისიამ და ამ კომისიის მიერ მიღებულ ბოლო რედაქციას წარმოადგენს. გამოცემას თან ერთვის ლექსიკონი, რომლის საბოლოო რედაქცია ეკუთვნის გურამ კარტოზიას. „ვეფხისტყაოსნის“ ტექსტი შეიცავს 1673 სტროფს, რომელთაგან 10 კომისიამ რუსთველურად ჩათვალა და პირველად შეიტანა ამ გამოცემაში. წიგნის ილუსტრატორი და დიზაინერია გიორგი ბოხუა.
მეორე წიგნი მოგითხრობთ „ვეფხისტყაოსნის“ შესახებ. გამოცემა წარმოადგენს „ვეფხისტყაოსნის“ და შოთა რუსთაველის შესახებ ენციკლოპედიურ კრებულს, ასეთი აკადემიური გამოცემა საქართველოში პირველად მომზადდა. მასში იხილავთ: ინფორმაციას თითქმის ყველა იმ პირზე, ვინც „ვეფხისტყაოსანთან“ არის დაკავშირებული, 1000-ზე მეტ საილუსტრაციო მასალას, 200-ზე მეტი ავტორის სტატიას და ნაშრომს. სრულიად საქართველოს კათოლიკოს-პატრიარქის უწმინდესისა და უნეტარესის ილია II-ის ვრცელ წერილს „შოთა რუსთაველი და მისი საღვთისმეტყველო შეხედულებანი“, რომელიც პირველად ქვეყნდება.
მესამე წიგნში „ვეფხისტყაოსანზე“ მოგვითხრობენ ავთანდილ არაბული და მამია მალაზონია. ფილოლოგიურ მეცნიერებათა დოქტორი ავთანდილ არაბული ორიგინალურად მოგვითხრობს „ვეფხისტყაოსნის“ შინაარსს. მაგალითად, თხრობა იწყება თავით: „ამბად მონათხრობი „ვეფხისტყაოსნის“ კითხვის დაწყებამდე.“ იქვე კი მინაწერია: „პოემის თარგმანების საწინააღმდეგოდ“. რას ნიშნავს ეს? მთხრობელს სურს, მკითხველი გააცნოს თავისუფალ მონათხრობს, რომელშიც მთხრობელის შეხედულებისამებრ, შეიძლება, ზოგი რამ გამოტოვებული იყოს, ხოლო ზოგი ფაქტი და მოვლენა - პირიქით, უფრო გამოკვეთილი და ხელშესახები. ყოველივე ამას ხელს უწყობს ცნობილი მხატვრის, მამია მალაზონიას ილუსტრაციები.
მეოთხე წიგნში „ვეფხისტყაოსანს“ წარმოგიდგენთ ქეთი მატაბელი. ქეთი მატაბელის ილუსტრაციები რუსთაველის პოემის სამყაროში ინტელექტუალური და ემოციური ჩაძირვის შედეგია. მხატვრის ფანტაზია მუშაობს სპარსულ, ჩინურ, ინდურ მოტივებზე. იგი მკითხველს ამოგზაურებს XII საუკუნის საქართველოში, სადაც რუსთაველის გმირები კიდევ უფრო რეალურად აღსაქმელია.
მეხუთე წიგნში მოცემულია „ვეფხისტყაოსნის“ გამოცემათა ბიბლიოგრაფია 1712-2008 წწ. მკითხველი „ვეფხისტყაოსნის“ 300-ზე მეტ გამოცემას ერთიანად ეცნობა. ბიბლიოგრაფიას დართული აქვს გამოცემათა სატიტულე ფურცლისა და ყდის გაფორმებები. რუსთაველის მკვლევარნი ამ გამოცემას 1937 წლიდან ელოდნენ, მაგრამ მხოლოდ თანამედროვე პოლიგრაფიულმა მიღწევებმა და, რა თქმა უნდა, მისი ორი ავტორის, „ვეფხისტყაოსნის“ ორი მოტრფიალის - ლევან თაქთაქიშვილის და მამუკა ჩხეიძის მოწადინებამ გახადა შესაძლებელი ამ წიგნის გამოცემა.