ქუთაისის სახელმწიფო უნივერსიტეტის მწვანე დარბაზში საქართველოს პედაგოგთა და მეცნიერთა თავისუფალი პროფკავშირის აფხაზეთის ორგანიზაციის მეორე საანგარიშო-საარჩევნო კონფერენცია გაიმართა. კონფერენციას აფხაზეთის განათლების სამინისტროს დაქვემდებარებაში მყოფი სკოლების წარმომადგენლები ესწრებოდნენ. 32 დელეგატის გვერდით სტუმრად მოწვეული პედაგოგებიც იყვნენ. სპეციალურად ამ ღონისძიებისთვის დევნილი მასწავლებლები ქუთაისში საქართველოს სხვადასხვა რეგიონებიდან ჩამოვიდნენ. მათ შორის იყო გალის რაიონის რესურს-ცენტრის წარმომადგენელი ნინო შამუგიაც.
კონფერენციაზე საქართველოს პედაგოგთა და მეცნიერთა თავისუფალი პროფკავშირის აფხაზეთის რესპუბლიკური ორგანიზაციის თავმჯდომარემ ნუგზარ ნაროუშვილმა 2005 წლიდან დღემდე გაწეული მუშაობის ანგარიში წარმოადგინა. დელეგატებმა პედაგოგთა და მეცნიერთა თავისუფალი პროფკავშირის აფხაზეთის რესპუბლიკური ორგანიზაციის ახალი თავმჯდომარე და საბჭო აირჩიეს.
კონფერენციას საქართველოს პედაგოგთა და მეცნიერთა პროფკავშირების თავმჯდომარე მანანა ღურჭუმალიძეც ესწრებოდა, რომელიც ცოტა ხნის წინ ევროპის მასწავლებელთა პროფკავშირების ვიცე-პრეზიდენტად აირჩიეს.