ჭიათურის მუნიციპალიტეტში არსებული გზების უმეტესობა მნიშვნელოვნად დაზიანებულია. შარშანდელი საპარლამენტო არჩევნების წინ მოხდა რამდენიმე მონაკვეთის ასფალტირება და ინერტული მასალით შეკეთება, თუმცა, ასფალტირებული  სვერი-ცხრუკვეთის მცირე მონაკვეთზე რამდენიმე მნიშვნელოვანი დაზიანების გამო, თავიდან მოხდება ასფალტის საფარის დაგება.

 ამ ეტაპზე მუნიციპალიტეტში მიმდინარეობს აქტიური სამუშაოები შუქრუთი-კორბოულის საავტომობილო გზაზე, რომელიც ჯამში აღემატება 18 კილომეტრს. აღნიშნული პროექტის ფარგლებში დაგეგმილია 4 ხიდის რეაბილიტაცია, ერთი ახალი ხიდის აგება, წყალგამტარი მილების, საყრდენების, ტროტუარებისა და ავტოპავილიონების მოწყობა.

 საგზაო სამუშაოებს აწარმოებს შეზღუდული პასუხისმგებლობის საზოგადოებები: ,,კავკასავტომაგისტრალი“ და ,,იბოლია“. პროექტი ფინანსდება მსოფლიო ბანკის მიერ და 9,5 მილიონ ლარამდე დაიხარჯება 2013 წლის 27 დეკემბრამდე.

 მუნიციპალიტეტში მიმდინარე სამეურნეო წელში კიდევ დაგეგმილია ორი ან სამი მიმართულების გზის ასფალტირება.