ალბათ, ბევრს აინტერესებს, ვინ იყო ის უცნობი ქალბატონი, რომელიც 10 სექტემბერს ქუთაისში ყოფნისას საქართველოს პრეზიდენტმა ხელში აიყვანა და მასთან ერთად სურათები გადაიღო. ეს ქალბატონი ჩვენი ქალაქის სტუმარი - „ჩვენებური“ ებრაელი, პოეტი, მწერალი და საზოგადო მოღვაწე თინა შაიშმელაშვილი აღმოჩნდა. ქალბატონი თინა წლების წინ ისრაელში გაემგზავრა და ქალაქ პაჰარიაში დამკვიდრდა. ახლა კი „მეორე სამშობლოს“ სიყვარულმა თავის მეგობრებთან ერთად საქართველოში ჩამოიყვანა.
როგორც ქართულ-ებრაული ჟურნალის „აშდოტის მოამბის“ რედაქტორმა, ბატონმა სულო სეფიაშვილმა გვითხრა, ისრაელიდან საქართველოში ათკაციანი ჯგუფით რამდენიმე დღით ჩამოვიდნენ. თურმე, ქალბატონი თინა გზაში ამბობდა, რომ ძალიან უნდოდა ბატონ სააკაშვილთან სურათის გადაღება: „10 ათას დოლარს ვჩუქნი მას, ვინც ამ სურვილის ასრულებაში დამეხმარებაო.“ ბატონი სულო კი ეხუმრებოდა - „შენ და მიშამ სურათი ერთად როგორ უნდა გადაიღოთ? ან ის უნდა ჩაიმუხლოს, ან შენ აგიყვანოს ხელშიო.“ ჩვენს უფროს კოლეგას „ჟურნალისტურმა ყნოსვამ“ არ უმტყუნა, ქალბატონ თინას კი ფულის გადახდა სულაც არ დასჭირდა. ებრაელების სტუმრობას ქუთაისში პრეზიდენტის ვიზიტიც დაემთხვა. როდესაც ეს ქალბატონმა თინამ გაიგო, არად ჩააგდო პოლიციელთა და დაცვის თანამშრომელთა წინააღმდეგობა და, როგორღაც პრეზიდენტთან მისვლა მოახერხა...
ქალბატონი თინა იხსენებს: „დაცვის თანამშრომლები ახლოს არ გვიშვებდნენ, მაგრამ როდესაც პრეზიდენტმა გაიგო, რომ ებრაელები ვართ, უთხრა, რომ გავეშვით. მე მოვიკითხე და ვუთხარი, რომ მზად ვიყავი, მასთან სურათის გადასაღებად ათი ათასი დოლარი გადამეხადა, ამაზე გაეცინა და ხელში ამიყვანა - აბა, გადაგვიღეთო...
- რატომ გსურდათ ასე ძალიან ბატონ მიშასთან სურათის გადაღება?
- მე ძალიან ემოციურად ვიყავი განწყობილი „ვარდების რევოლუციის“ დროს. ის ღამე თეთრად გავათენე და დავწერე საოცარი წერილი. მე მსგავსი რამ არავისთვის დამიწერია. ეს წერილი ერთ ძალიან სანდო ადამიანს გამოვატანე, რომელმაც დამირეკა და მითხრა, მშვიდად იყავი, წერილი პრეზიდენტის დედას, ქალბატონ გიულის გადავეციო.
- წერილში რას სწერდით, სთხოვდით რამეს?
- არა, არაფერს ვთხოვდი... მე საქართველო მიყვარს, რაც აქედან წავედი, იქაურ ქართველებს მათ დედაენას, ქართულ ენასა და ლიტერატურას ვასწავლი.
ქართველ-ებრაელ ქალთა ჯგუფის ხელმძღვანელი, ქალბატონი იზოლდა მოშიაშვილი კი დასძენს: „ჩვენში საქართველოს სიყვარული არასოდეს განელდება. გვინდა, რომ ამ სიყვარულით ჩვენი მომავალი თაობებიც დავაკავშიროთ ერთმანეთს.
ბატონ სულო სეფიაშვილის თქმით, საქართველოში ისინი, პირველ რიგში, ამ სიყვარულმა ჩამოიყვანა, თუმცა საქმიანი შეხვედრებიც ჰქონდათ, ქუთაისის „მწერალთა სახლში“ თავიანთ კოლეგებს, მწერლებსა და ჟურნალისტებს შეხვდნენ. ქვეყნის ეკონომიკურმა მდგომარეობამ, მართალია, გული დასწყვიტათ, მაგრამ მათთვის საქართველო მაინც ის ქვეყანაა, რომელთანაც სერიოზული საქმიანი ურთიერთობების დამყარებას იმედოვნებენ.