პრემიერის რამდენიმესაათიანი პრესკონფერენცია რეგიონულ მედიასთან
საქართველოს პრემიერ-მინისტრი ბიძინა ივანიშვილი 13 მარტს რეგიონული მედიის წარმომადგენლებს შეხვდა და რამდენიმე საათის განმავლობაში ჟურნალისტების კითხვებს პასუხობდა. პრემიერმა შეხვედრაზე ადგილობრივი თვითმმართველობის რეფორმებზე, რეგიონში განსახორციელებელ პროექტებსა და სხვა მნიშვნელოვან საკითხებზე ისაუბრა.
ბიძინა ივანიშვილმა რეგიონულ მედიასთან თითქმის ყველა საკითხზე ღიად, უშუალოდ ისაუბრა და ყველა შეკითხვას უპასუხა. მან ისაუბრა თვითმმართველობაზე, სოფლის მეურნეობაზე, საკონსტიტუციო ცვლილებებზე და თანაგუნდელებზეც კი.
„ოლეგ იაძემ ნამდვილად განაცხადა, რომ მე პატარა ბიძინა ვარო. ჯერ დიდი რას აკეთებს, რომ პატარამ გააკეთოს, რომ ასეთი რამ დავიბრალოთ,“ - განაცხადა ღიმილით პრემიერმა კასპის გამგებლის თაობაზე დასმული კითხვის პასუხად.
ივანიშვილმა კომენტარი სოციალურად დაუცველთა სიიდან ათასობით ადამიანის ამორიცხვაზეც გააკეთა და განაცხადა, რომ მათ დახმარებების მიცემა აღუდგებათ, ხოლო ასეთი რამ რომ არ მოხდეს, კანონმდებლობაში ცვლილებები შევა.
„დაახლოებით სამი ათას სოციალურად დაუცველ პირს შეუწყდა სოციალური დახმარება... სავარაუდოდ, ამ ადამიანებს სოციალური დახმარება აღუდგებათ. სოციალურად დაუცველთა სიიდან ამოიღეს ოჯახები, რომლებსაც სატელიტური თეფშები ჰქონდათ. კანონმდებლობაში გვინდა, ცვლილება შევიტანოთ, რომ სატელიტური თეფშის გამო სოციალურად დაუცველები სიიდან აღარ ამოიღონ,“ - განაცხადა ივანიშვილმა.
სააკაშვილი და მისი იდეოლოგიის მსხვერპლნი...
პრემიერ-მინისტრი ყბადაღებული საკონსტიტუციო ცვლილებების თემასაც შეეხო და განაცხადა, რომ პრეზიდენტმა სააკაშვილმა კონსტიტუციაში უპრეცედენტო ნორმა შეიტანა, რომლითაც პარლამენტის გარეშე შეუძლია, ახალი მთავრობა დანიშნოს.
„ამ თემის წამოწევით გავუკეთეთ დევალვაცია ამ სიმახინჯეს. დღეს საქართველოს მოსახლეობის უმრავლესობამ და ძირითადმა მოთამაშეებმა გაიგეს, რაშია საქმე და სააკაშვილი რომ მუდამ ამბობს, არ გამოიყენებს... არ გამოიყენებს კი არა, ვერ გაბედავს,“ - ამბობს ბიძინა ივანიშვილი.
მისივე თქმით, როდესაც კანონპროექტი ამ საკონსტიტუციო ნორმის გაუქმებაზე პარლამენტში შევა, უკვე „ნაციონალურ მოძრაობაზე“ იქნება ყველაფერი დამოკიდებული - მათ მიერ მიცემული ხმები მათ ან სარგებელს მოუტანს, ან - ზიანს.
„პოლიტიკურად, თუ ეს კონსტიტუცია ჩავარდება, ეს ჩვენთვის სასარგებლოცაა, რადგან ოპონენტები გაინადგურებენ თავს. ადამიანურად, კი არაა ჩემთვის კარგი „ნაციონალური მოძრაობის“ განადგურება, რაშიც სააკაშვილი ბრალს გვდებს,“ - განაცხადა ივანიშვილმა და დასძინა, რომ პრეზიდენტი საკუთარი მოქმედებით „ნაციონალურ მოძრაობას“ თვითონვე ანადგურებს მაშინ, როდესაც უნდა, ეს კონსტიტუცია შეინარჩუნოს. „თუკი, სააკაშვილი მაინც გაბედავს მთავრობის დათხოვნას, ჯერ ღიმილს მიიღებს, შემდეგ კი - რისხვას.“
პრემიერ-მინისტრი ფიქრობს, რომ ძალიან ბევრი საჯარო მოხელე და მისი სხვა მხარდამჭერები, სინამდვილეში, სააკაშვილის იდეოლოგიის მსხვერპლნი იყვნენ.
„ძალიან ბევრი მოხელე, კუბლაშვილიცა და სხვებიც, ვინც სააკაშვილის გუნდის წევრებად მოიხსენებოდნენ, არიან მსხვერპლნი მისი იდეოლოგიის და მისი სისტემის. ასეთივე მსხვერპლი ვიყავი მეც. მე არ გამიგია კუბლაშვილზე, რომ ის არის მექრთამე, ძალიან მდიდარი. ის, უბრალოდ, ვერ ახერხებდა, უარი ეთქვა ადამიანისა და სისტემისთვის, რომელიც საქართველოში წლების განმავლობაში ჩამოყალიბდა. უბრალოდ, მეც და სხვა ბევრმაც ეს გვიან გავაცნობიერეთ. კუბლაშვილი გახდა მსხვერპლი ამ სისტემის და ის ვერ ახერხებდა აქედან ამოვარდნას.“
ადგილობრივი თვითმმართველობა
პრემიერ-მინისტრის თქმით, ადგილობრივი თვითმმართველობის რეფორმა მისი პოლიტიკური გუნდისთვის ყოველთვის პრიორიტეტული იყო და სწორედ ხელისუფლების ეს რგოლი არის ყველაზე მნიშვნელოვანი რგოლი იმისათვის, რომ საზოგადოებამ ხელისუფლება აკონტროლოს.
„საზოგადოება ვერ ახერხებს, ფილტრის როლი შეასრულოს, აკონტროლოს ხელისუფლება და ბოლო 20 წლის განმავლობაში რა პრობლემებიც გვქონდა, ეს არის, რომ ჩვენ საკუთარი ქვეყნის მართვა ვერ ვისწავლეთ,“ - განაცხადა ივანიშვილმა. მისივე თქმით, ამ პრობლემის მოსაგვარებლად აუცილებელია ადგილობრივი თვითმმართველობის გაძლიერება და, ამ მიზნით, მთავრობამ უკვე განიხილა რეგიონული სამინისტროს მიერ წარმოდგენილი სტრატეგია, რომლის მიხედვითაც, ადგილობრივი თვითმმართველობის განვითარების გეგმა უნდა იქნას შემუშავებული. რეფორმის შედეგად ჩამოყალიბდება ორდონიანი, რეგიონული და მუნიციპალური თვითმმართველობა, გაიზრდება თვითმმართველი ქალაქების რაოდენობა და სოფლებისაგან თემები ჩამოყალიბდება, რომლის ბაზაზეც მუნიციპალიტეტები ფორმირდება. გარდა ამისა, 3500 სოფელში მმართველი საბჭოები შეიქმნება.
ინფრასტრუქტურა
„ნაციონალური მოძრაობის“ წარმომადგენლები, საკმაოდ ხშირად, ინფრასტრუქტურული პროექტების შეჩერებაზე აკეთებენ ხოლმე აქცენტს. პრემიერ-მინისტრის თქმით, რეგიონში განსახორციელებელი პროექტების ფონდი არათუ შემცირდა, არამედ - გაიზარდა.
ივანიშვილი ამბობს, რომ 2013 წელს 200 მილიონი ლარია გამოყოფილი; გამჭვირვალე გახდება პროექტების წარდგენის და დაფინანსების პროცესები. სოფლის მხარდაჭერის პროგრამაზე დამატებით 50 მილიონია გამოყოფილი, რაც ხიდების მოწყობას და სხვა ინფრასტრუქტურულ პროექტებს მოხმარდება. მთავრობა აგრძელებს იმ პროექტებს, რაც წინა წლებში იყო დაწყებული და ასევე, იწყებს ახალი პროექტების განხორციელებას - იგულისხმება მაგისტრალური გზების მშენებლობა და სხვა.
გარდა ამისა, 2013 წელს სარეაბილიტაციო სამუშაოები 600-ზე მეტ სკოლას ჩაუტარდება. ამისთვის ბიუჯეტში 32 მილიონი ლარია გამოყოფილი და მომავალი წლიდან ეს თანხა კიდევ უფრო გაიზრდება. 2013 წლის ზამთრისათვის ყველა სკოლა გათბობით იქნება უზრუნველყოფილი.
„გაიზარდა თანხები, არ შემცირებულა, - მაგას მერაბიშვილი ამბობს. საიდან მოაქვს ეს ციფრები, მერაბიშვილი სულ კრიზისს გვიგეგმავს, ხან ბიუჯეტი გვენგრევა თავზე, ხან ინვესტორები გარბიან, ხან ევროპისკენ აღარ მივდივართ თურმე და მერაბიშვილი გვაბრუნებს, გვიგრეხავს ხელებს... ხან რაღაცებს იგონებს, იქედან მოდის ეს, არაფერი არა აქვთ სალაპარაკო და სიცრუებს ყრიან მხოლოდ,“ - აცხადებს ბიძინა ივანიშვილი.
სოფლის მეურნეობა...
„სასოფლო-სამეურნეო ბარათების დარიგების პროცესი, პრაქტიკულად, დასრულებულია. დარჩენილია მხოლოდ სამი რეგიონი: სამეგრელო, რაჭა-ლეჩხუმი და სამცხე-ჯავახეთი. შეღავათიანი აგროკრედიტები, რომელსაც ჩვენ ვპირდებოდით მოსახლეობას გადამამუშავებელი ქარხნების მშენებლობისათვის, მიეცემათ 0-დან 3%-მდე, მინიმუმ 60 საწარმო. თუ აქტიურობა იქნება, უფრო მეტსაც გამოეყოფა შეუზღუდავად, რამდენი პროექტიც იქნება შემოსული, ყველას ექნება საშუალება, მიიღონ 7-წლიანი კრედიტი 30 000-დან 600 000-მდე ლარი. ეს მცირე და საშუალო საწარმოს შეძენისათვის საკმარისია. წვრილ ფერმერებს შეუძლიათ, 6-თვიანი უპროცენტო სასაქონლო კრედიტი აიღონ. ასეთ კრედიტში 30%-ზე მეტს იხდიდნენ,“ - განაცხადა ივანიშვილმა.
ივანიშვილი უხარისხო პროდუქციის კონტროლსაც შეეხო და განაცხადა, რომ მთავრობა ყველაფერს აკეთებს იმისთვის, რათა ქართულ ბაზარზე ჯანსაღი, ქართული პროდუქცია დაბრუნდეს.
„ამისათვის ჩვენ საბაჟოებზე კონტროლი დავაწესეთ, რაც ადრე არ ხორციელდებოდა და ბევრი გაურკვეველი პროდუქცია შემოდიოდა. პირველი ეფექტები უკვე გვაქვს. ათეულობით ტონა დაავადებული კარტოფილი შევაჩერეთ და ახლა სხვა პროდუქციის შემოწმებაც ხორციელდება,“ - განაცხადა ივანიშვილმა.
საპარლამენტო უმრავლესობა, რომელსაც გამოცდილება არა აქვს...
ბიძინა ივანიშვილი თავის პოლიტიკურ თანაგუნდელებსაც შეეხო და ჟურნალისტების მხრიდან რამდენიმე მათგანის მისამართით გაკეთებულ კრიტიკულ შენიშვნებს და პრეტენზიებს პასუხობდა. მაგალითად, პოლიციის პრორექტორის, „ქართული ოცნების“ ერთ-ერთი აქტიური წევრის, მოჭიდავე ლუკა კურტანიძის გამონათქვამები, რომელიც ხშირად გამხდარა სამოქალაქო საზოგადოების კრიტიკის საგანი. პრემიერმა ამას „გამონათქვამებში ცდომილება“ უწოდა.
„ვაღიარებ, რომ მას გამონათქვამებში ცდომილება ჰქონდა და ახლაც აქვს, თუმცა არა მარტო მას. ეს, რა თქმა უნდა, ცუდია და აზიანებს პირადად მას. თავშეკავებულობა და კორექტირება საუბარში აკლია, მაგრამ თავად ის არ არის ცუდი კაცი. ხშირად ემოციებს ვერ ვიკავებთ და ისეთ რამეს ვამბობთ, რაც არ უნდა ვთქვათ,“ - განაცხადა ივანიშვილმა. პრემიერმა ისიც აღნიშნა, რომ, მაგალითად, კობა დავითაშვილი ზედმეტად აქტიურობს კაზინოებისა და ტოტალიზატორების აკრძალვასთან დაკავშირებით. პარლამენტის თავმჯდომარის „გულისტკივილიც“ გაამხილა საჯაროდ:
„ჩვენ გვყავს უმრავლესობა პარლამენტში, საპარლამენტო მუშაობის გამოცდილება არ აქვთ. ახლა სამი დეპუტატი უნდა ავირჩიოთ დამატებით, რომელიც მთავრობაში შევიყვანეთ. უსუფაშვილი ყოველდღე მახსენებს - არ გავბედო და ვინმე ცნობილი მსახიობი არ შევიყვანო.
პირდაპირ მახსენებს: ვისი გუნდის წევრიც გინდა იყოს, მან უნდა იცოდეს, როგორ უნდა იმუშაოს პარლამენტში. ჩვენი გუნდიდან სამი კაციც ვერ მეხმარება - ასეთი პოზიცია აქვს უსუფაშვილს. ჩვენ შევიყვანეთ ჩვენი საყვარელი ხალხი, მოვიგეთ არჩევნები, მაგრამ იქ არის პროცედურა,“ - განაცხადა ივანიშვილმა.
მედროვეობაზე...
ბიძინა ივანიშვილი რეგიონებში „ქართული ოცნების“ პარტიული სტრუქტურების ჩამოყალიბებასაც შეეხო და განაცხადა, რომ ამ ეტაპზე ის საკმარის ყურადღებას ვერ აქცევს თავის პარტიას.
„იმდენად ბევრი მაქვს საქმე მთავრობაში, რომ პარტიის განვითარებაზე, პრაქტიკულად, დრო აღარ მყოფნის, არადა, ესეც საჭიროა. მედროვეობა ძალიან რთული მოსახერხებელია, ეს ხალხი არის აქტიური, ყველაზე აქტიურები არიან. ძველიდან ახალში ისე ახერხებენ გადმოსვლას, რომ თვალს ვერ დაახამხამებ. ამჟამად, პარტიის განვითარების პირველი ეტაპი მიმდინარეობს, რომელიც რამდენიმე თვეში უნდა დასრულდეს. მეორე ეტაპი უფრო გასუფთავების ეტაპი გვექნება, რომ ხარისხი ავამაღლოთ,“ - განაცხადა „ქართული ოცნების“ ლიდერმა.
რა ბედი ელის ქუთაისს?
ხანგრძლივი პრესკონფერენციის დროს, სხვა საკითხებთან ერთად, პრემიერ-მინისტრი ქუთაისისა და პარლამენტის თემასაც შეეხო. ივანიშვილის განცხადებით, პარლამენტის შენობა არის ძალიან რთული, ძალიან გაუთვლელად გაკეთებული და აპრილში პრობლემები შეიქმნება.
„მოახერხებენ თუ არა დეპუტატები მუშაობას, მე არა ვარ დარწმუნებული, როდესაც აქტიური მზე იქნება აპრილიდან მოყოლებული; მაისში ნამდვილად ვერ იმუშავებენ. ძალიან არაეფექტურია, რომ ქუთაისში არსებობს პარლამენტი. სააკაშვილს ჰქონდა განცდა, რომ ამით ქუთაისი აყვავდება. ვერ აყვავდება,“ - ამბობს ბიძინა ივანიშვილი.
მისივე თქმით, ქუთაისს სჭირდება უამრავი საწარმოს გახსნა, გადამამუშავებელი იქნება ეს თუ სხვა ტიპის. „ჩვენ ამას აუცილებლად გავაკეთებთ. უნდა იყოს მასიური დასაქმება, დაცლილია ქუთაისი, პრაქტიკულად, კორპუსებში ერთი-ორი ნათურა ანთია ღამე, ეს პროცესები უნდა შემოვაბრუნოთ. აგერ არსებობს, უკვე წელიწადი გადის, პარლამენტი, მერე რა, რამე გარდატეხა მოხდა ქუთაისში ამის საფუძველზე?!“ - კითხულობს პრემიერი.
„პირველი გადმოსახედიდან, ძირითადად, გადამამუშავებელი საწარმოების სიმრავლე უნდა იყოს ქუთაისში. დასავლეთი არის ძალიან უხვმოსავლიანი რეგიონი, თუ მივხედავთ... ჩვენთვის ხილის გასაღებისათვის არ უნდა იყოს მარტო შემოდგომა. გადამამუშავებელი ტიპის საწარმოები უნდა აშენდეს ქუთაისში და ქუთაისს უნდა დაუბრუნდეს ის ფუნქცია, რაც მას ჰქონდა, მეორე ქალაქი იყო სიდიდით და მნიშვნელობით. ასევე, უნივერსიტეტის გადატანაზეა საუბარი, თუმცა ჯერ კონკრეტულად ვერაფერს მოგახსენებთ, მაგრამ ვმუშაობთ,“ - განაცხადა ივანიშვილმა გაზეთ „P.S.“-ის მიერ დასმული შეკითხვის პასუხად.
ნატო გუბელაძე
პაატა ცნობილაძე