25 მარტს ქუთაისის ახალგაზრდობის საქმეთა საქალაქო სამსახურის უფროსმა ნიკა კუხიანიძემ, იმერეთის რეგიონის ფსიქოლოგთა ასოციაციის თავმჯდომარემ დარეჯან მაღლაკელიძემ და ფსიქოლოგმა ციცი ჯინჯიხაძემ მერიის სააქტო დარბაზში მოწვეულ #2, #9, #17, #37, #45 საჯარო სკოლის მოსწავლეებს გააცნეს პროექტი „წარმატებული ადამიანი - წარმატებული საზოგადოება.“
29 მარტიდან ფსიქოლოგები ქალაქის ყველა საჯარო სკოლაში ჩაატარებენ ტრეინინგ-კურსებს, რომლის მიზანია ახალგაზრდა ადამიანებში წარმატებული პიროვნების აღზრდა, საკუთარი შესაძლებლობების განვითარების, თვითდამკვიდრების გამოვლენის და სწორი რეალიზაციის ხელშეწყობა.
სკოლებში ფსიქოლოგები ძირითადად შემდეგ სფეროებს მიაქცევენ ყურადღებას: ფსიქოპროფილაქტიკა, ფსიქოდიაგნოსტიკა, ფსიქოკორექცია, ფსიქოლოგიური კონსულტაციები.
პრეზენტაციაზე საუბარი იყო მოსალოდნელ შედეგებზეც. პროექტის წარმატებით განხორციელება მოსწავლეს ხელს შეუწყობს, მოახდინოს საკუთარი პიროვნული შესაძლებლობების სრული გამოვლენა და განვითარება.