რაჭა-ლეჩხუმის გასაყარზე, იქ, სადაც მდინარე რიონი მარცხნივ, სამხრეთისაკენ, მკვეთრად უხვევს, ზეცისკენ მიმართული კლდოვანი ქანობებია, საუკუნეებთან და მტერთან ნაომარ, დაშლილ ციხე-სიმაგრეს რომ მოგვაგონებს. ელექტროთეატრ „რადიუმის“ მოხელეს (საარქივო დოკუმენტის მიხედვით), ვასილ ამაშუკელს, ფილმის („აკაკის მოგზაურობა რაჭა-ლეჩხუმში“) №1 სამონტაჟო ფურცლის ნუსხაში 22-ე ტიტრი ასე ჩაუწერია - „საკვირველი სანახაობა „საირმის“ მთაზე. საირმის მთის ხედი „რაჭაში“.
მანქანას ნაშალი კლდის ფერდობთან ვაჩერებთ, ჩვენს წინაშე საირმის მთის დიდებული სანახაობაა, - თხრობა ჟამთა სვლაზე კვლავ გრძელდება... 100 წელი გასულა აკაკისადმი მიძღვნილი სახალხო დღესასწაულიდან დღემდე.
დიდ საქმეს დიდი ადამიანი მოიკვლევს და ერის ისტორიის საამაყო ფურცლებად აქცევს. აგერ უკვე, თითქმის 50 წელია, ყოველივე წვრილმანსაც კი აღნუსხავს კინოკრიტიკოსი, შოთა რუსთაველის თეატრისა და კინოს სახელმწიფო უნივერსიტეტის მთავარი სამეცნიერო კონსულტანტი, პროფესორი გოგი დოლიძე, დღე - სასწაულთან დაკავშირებულს, როგორც მწერალი ოტია იოსელიანი იტყოდა.
...განვლილი საუკუნე წამის მეათასედად იქცა ჩვენს თვალწინ. პროფესორი მიწას დაჰხედავს და იტყვის საკრალური მნიშვნელობით: „აქ იდგა ძია ვასო ორფუთიანი სინემატოგრაფით... აპარატი მხოლოდ ვერტიკალურად მოძრაობდა ქვემოდან ზემოთ, ან პირიქით, საგნის მოახლოვება ან დაშორება არ შეეძლო. ამიტომ ძნელი არ არის განსაზღვრო, სად იდგა ძია ვასო, როცა საირმის კლდეთა ქანობს იღებდა.“
შეუძლებელია, ამ დროს შინაგანმა სულიერმა თროლვამ არ აგიტანოს, ჩვენ ხომ ახლა, ამ მომენტში, ეროვნულ ფასეულობათა შინაგანი (იმანენტური) გააზრების უნებლიე მონაწილენი ვხდებით.
მალე „პიონერფილმის“ ავტობუსიც დაგვეწია, დიდი პანოთი დამშვენებული. პანოზე გამოსახულია აკაკის გამგზავრება „გრანდოტელიდან“ (ქუთაისი). გვერდს უმშვენებენ ვასილ ამაშუკელი შემართული სინემატოგრაფით და თანმხლები პირები. წარწერა გვაუწყებს, - „აკაკის მოგზაურობა რაჭა-ლეჩხუმში, 1912-2012 წელი“. კინომცოდნეები, მოსწავლე-ახალგაზრდობის სასახლის პედაგოგები - გრიშა ჩიგოგიძე და მარინე კერესელიძე გვიახლოვდებიან ყმაწვილებთან ერთად. მომავალ კინორეჟისორთა და ოპერატორთა ჟრიამული ავსებს საირმის მთის სანახებს.
ყოველივე კი ასე დაიწყო: 20 ივლისს, 17 საათზე, დემოკრატიული ჩართულობის ცენტრში (USAID), ბატონი გოგი დოლიძის თაოსნობით, ქუთაისის საზოგადოებრიობამ, თბილისიდან ჩამოსული სტუმრების - პროფესორ არნოლდ გეგეჭკორის, თენგიზ ურთმელიძის მონაწილეობით, მოაწყო კონფერენცია, რომელიც აკაკი წერეთლის პატივსაცემად რაჭა-ლეჩხუმში გამართული სახალხო ზეიმის 100 წლისთავს მიეძღვნა.
კონფერენციაზე ივ. ჯავახიშვილის სახელმწიფო უნივერსიტეტის პროფესორმა არნოლდ გეგეჭკორმა საზოგადოებას წარუდგინა გოგი დოლიძის წიგნი „აკაკის მოგზაურობა“ - 90; ფილმი, ეპოქა, ადამიანები...“ იგი გამოიცა 2002 წელს და მიეძღვნა აკაკის რაჭა-ლეჩხუმში მოგზაურობის 90-ე წლისთავს. წინა გამოცემებისგან განსხვავებით, მონოგრაფიაში ყურადღება გამახვილებულია ამ მოგზაურობის შესახებ გადაღებულ ფილმზეც, რომლის ავტორი ვასილ ამაშუკელია. მისი ფილმი სამართლიანად ითვლება იმდროინდელი მსოფლიო დოკუმენტური კინოს უნიკალურ ძეგლად და, არსებითად, სწორედ მან ჩაუყარა მტკიცე ბალავარი ეროვნული თვითმ-ყოფადობით ესოდენ გამორჩეულ ქართულ კინემატოგრაფს.
ავტორმა ისაუბრა იმ სიახლეებზე, რაც წიგნის გამოცემიდან ათი წლის განმავლობაში იქნა მოკვლეული და მიზნად ისახავს ვასილ ამაშუკელის მოღვაწეობის საერთაშორისო არენაზე გატანას; რომ შესაძლებელია, საქართველოში აკრედიტებული საელჩოების თანადგომით, ქუთაისში ჩატარდეს ვასილ ამაშუკელისადმი მიძღვნილი საერთაშორისო კინოფესტივალი. კონფერენციაზე გადაწყდა, რომ 21 ივლისს, 7 საათზე, ზუსტად იმავე დროსა და იმავე საათზე, ყოფილი სასტუმრო „გრანდოტელის“ მიმდებარე ტერიტორიიდან მსურველთა გამგზავრებულიყვნენ აკაკის ნაკვალევზე.
დილით თავი მოიყარა საზოგადოებრიობამ. ხელოვნებათმცოდნე თამთა თურმანიძემ სიურპრიზი შემოგვთავაზა, - აკაკის გამგზავრების ამსახველი დიდი პანო ქუჩაში გამოფინა და ჟამთა სვლასთან მიგვაახლოვა.
რაჭაში პირველი შეხვედრის ადგილი სოფელი ჭრებალოა, საჯარო სკოლა. მხარის გუბერნატორის მოადგილე როსტომ ცხვედიანი გულთბილად გვმასპინძლობს. სკოლის კლუბი გადაჭედილია. გოგი დოლიძე ჩვეული მჭევრმეტყველებით მოუთხრობს მსმენელებს ფილმის ისტორიასა და სახალხო ზეიმის მნიშვნელობაზე. პროექტორმა ეკრანი გაანათა, „გაცოცხლდა“ ასწლეულის დასაწყისში მომხდარი ამბები. აგერ, ვარდებით მოსირმულ საკარცხულზე დაბრძანებულა აკაკი, მის სახილველად ამაყად მოაბიჯებენ ერნი და ბერნი, ქართული ჯიშისა და ჯილაგის მხარბეჭიანი ჩოხოსნები, ჩიხტიკოპიანი მანდილოსნები, დავარცხნილნი და მოვლილნი - გეგონება, პარიზული სალონებიდან ეს-ესაა გამოვიდნენ აკაკის დასახვედრად. გიმნაზიელის ქუდიანი რაჭველი ბიჭუნიკა გამორბის, თავს და კისერს იტეხს, მისი ლექსები სულ ზეპირად იცის, ერთხელ უკვე დაინახა მგოსანი, მაგრამ კიდევ უნდა, თვალი შეავლოს... 26-ე ტიტრი გამოისახა: აკაკი წერეთელი სოფელ ჭრებალოსთან ხალხთან ერთად. იდუმალი განცდა ეუფლება მაყურებელს... პიონერფილმელები აკაკისადმი მიძღვნილ ლიტერატურულ მონტაჟს წარუდგენენ დარბაზს, თავის მხრივ არც ადგილობრივნი რჩებიან ვალში, აკაკის ლექსებზე შექმნილ სიმღერებს ფანდურზე ამღერებენ...
გრძელი გზა გვაქვს გასავლელი: ამბროლაური, ნიკორწმინდა, წესი, ონი, შემდეგ - ლაილაში...
„გაგიგონიათ, რომ სადმე და ოდესმე, რომელიმე ქვეყანაში ხალხს თავისი საყვარელი პოეტის, მსახიობისა თუ ნებისმიერი საზოგადო მოღვაწისათვის 200 კილომეტრზე გადაჭიმული, თორმეტდღიანი დღესასწაული გაემართოს?“ - სვამს კითხვას თავისი წიგნის შესავალში კინოკრიტიკოსი გოგი დოლიძე, ჰოდა, ახლა ეს გზა უნდა გავიაროთ არა ფაეტვნებით, არამედ ავტომობილებით. „დიდ რუს მწერალს ლევ ტოლსტოის გული წყდებოდა, რომ ვერა და ვერ გახდა „სახალხო“ მწერალი, - გზა და გზა მოგვითხრობს გოგი, - 1908 წელს, ლევ ტოლსტოის დაბადების 80 წლისთავის აღსანიშნავად, იასნაია პოლიანაში დედაქალაქიდან ეახლნენ, აღნიშნეს კიდეც ეს ფრიად საპატიო თარიღი, მაგრამ ისე, რომ ტოლსტოის მეზობელ გლეხებს არა გაუგიათ რა. 130 მილიონიან რუსეთში მას მხოლოდ რამდენიმე ათასი კაცი კითხულობდა.“
სწრაფად ვერ მივდივართ, გვაჩერებენ: იგონებენ 10 წლის წინანდელ იუბილეს, გოგის მოკითხვას აბარებენ ცნობილ კინორეჟისორ რეზო ჩხეიძესთან (ავადმყოფობის გამო ვერ მონაწილეობს). იგონებენ და ზეციურ საქართველოში სულის საცხონებელს უთვლიან სოფლის მოჭირნახულეს, სულმნათ ოტია იოსელიანს.
მოგზაურობის გვირგვინი სოფელი ლაილაშია, სოფლის თავკაცებთან და სკოლის დირექტორთან ერთად გვმასპინძლობს ქუთაისის მერის მოადგილე ნიკო კაჭკაჭიშვილი. 27 ივლისი მისი დაბადების დღეა, მივულოცეთ, მაგრამ ყველაზე მთავარი ის არის, რომ ვიგებთ: თურმე, დიდმა ბაბუამ ამ დღეს, 100 წლის წინ, აკროსტიხი უძღვნა აკაკის, თავის მხრივ კი პოეტმა გულში ჩაიკრა სახალხო მთქმელი, ღმერთმა ნუ გამოულიოს საქართველოს ნიჭიერი ხალხიო.
დასრულდა იუბილე. „ერმა და ბერმა ხშირხშირად უნდა შემოუძახოს თავისთავს და შეგვახსენოს მამულიშვილთა საქმენი, დავიწყებას რომ არ მიეცეს,“ - ამბობს ბატონი გოგი დოლიძე.
ნანახმა და განცდილმა გვაგრძნობინა, რომ საქართველო მარადცოცხალი სიძველეა, აქ ყველაფერი ძველი თანამედროვეობასთან ერთად განაგრძობს არსებობას. სტატიის ავტორებმა მადლობა უნდა ვუთხრათ ბატონებს - არნოლდ გეგეჭკორს და თენგიზ ურთმელიძეს, პიონერფილმის მესვეურებს - ქალბატონ მარინე კერესელიძეს და ბატონ გრიშა ჩიგოგიძეს, - ახალგაზრდობასთან სწორი და მართებული პოზიციის განსაზღვრისათვის, იმის მცდელობისათვის, რომ ადრეული ასაკიდან აზიარებენ ბავშვებს ნაციონალურ სოციოკულტურას. ასწლეული ეპოქის ერთდროულმა შესრუტვამ (ფილმი და ნანახ-განცდილი) არ შეიძლება, სიკეთის ნაყოფი არ გამოიღოს და ცხოვრების ესთეტიური გემოვნებითი სტილი არ გამოუმუშაოს ახალგაზრდობას.
ვასილ ამაშუკელმა თავისი ფილმით შეუფასებელი განძი დაუტოვა ქართველ ერს, თუ თამამად ვიტყვით, მსოფლიო საკაცობრიო ცივილიზაციას. ეს განძი კვლავ ახალ კვლევებს ითხოვს, თუნდაც იმ კუთხით, რომ, როცა ეს დიდი ზეიმი რაჭა-ლეჩხუმში იმართებოდა, სულ რაღაც ექვს წელიწადში საქართველო დამოუკიდებლობას გამოაცხადებდა... იყო თუ არა ეს ერი მზად დამოუკიდებლობისათვის, „თავისთავის ყუდნებისათვის?“ კითხვაზე პასუხი ვასილ ამაშუკელის გადაღებული ფილმისთვის მიგვინდვია.
გიორგი შავგულიძე
ტარიელ ჭიღვარია