18 ივლისს დავით კაკაბაძის სახელობის სახვითი ხელოვნების გალერეაში ოზურგეთელი მხატვარ-გრაფიკოსის ნამუშევრები გამოიფინა. ავთანდილ თავართქილაძე ოზურგეთის თანამედროვე სახვითი ხელოვნების ცენტრის დირექტორი და სამხატვრო სკოლის პედაგოგია. მას საზოგადოება ასევე იცნობს, როგორც ქართული საბრძოლო ხელოვნების უძველესი სახის - ხრიდოლის მცოდნესა და პოპულარიზატორს.
ქუთაისმა მხატვრის მესამე პერსონალურ გამოფენას უმასპინძლა. მანამდე კი მისი ნახატების დათვალიერება გურიასა და ბათუმში შეეძლოთ მსურველებს. შემოქმედის თქმით, მისი ნამუშევრები მომავალში თბილისში გამოიფინება.
ექსპოზიციაში ძირითადად წარმოდგენილი იყო პორტრეტები და პეიზაჟები, რომელთა უმრავლესობაც მხატვარმა წლების წინ, მათ შორის - სტუდენტობის დროს შექმნა, საინტერესო კომპოზიციებში.
პროექტი, რომლის ფარგლებშიც მხატვარი ქუთაისს სტუმრობდა, რეგიონულ მუზეუმებს შორის გაცვლითი სახის გამოფენების მოწყობას ითვალისწინებს.
„დღეს ქუთაისში ჩემი ნამუშევრების პერსონალური გამოფენაა, რაც ძალიან მახარებს. ჩემთვის დიდი პასუხისმგებლობაა ამ ქალაქში გამოფენის გაკეთება, რადგან უძველესი კულტურის მქონეა.“ - გვითხრა მხატვარმა.
გამოფენას მრავლად ესწრებოდნენ ქუთაისის საზოგადოებრიობის წარმომადგენლები ხელოვნების მუშაკები, ახალგაზრდობა. გულთბილი სიტყვებით შეაფასეს ოზურგეთელი ხელოვანის შემოქმედება ცნობილმა მხატვარმა გია ბუღაძემ, ქუთაისის საკრებულოს თავმჯდომარემ ამირან ხვადაგიანმა, გალერიის დირექტრმა, ხელოვნებათმცოდნე ელისო ჩოგოვაძემ, პოეტმა გიზო თავაძემ და სხვებმა.
გია ბუღაძემ გაზეთ „P.S.“-თანაც გააკეთა კომენტარი გამოფენასთან დაკავშირებით: „ავთოს პირველი შემოქმედებითი ნაბიჯები ძალიან კარგად მახსოვს. ის არაჩვეულებრივი გრაფიკოსია, შრომით რომანტიკოსია, რომანტიკული წუხილითა და ნაღველით სავსე სამყარო აქვს, მაგრამ - იმედიანი. რაც მთავარია, მის შემოქმედებაში ყველამ უნდა დაინახოს ის სულიერება, რასაც ეს მხატვარი ატარებს.“
„საოცარი ნამუშევრებია, სითბოთი და სიყვარულით სავსე. განსაკუთრებით მომეწონა მოწყენილი კაცის პორტრეტი, რომელსაც თვალებში უდიდესი სევდა აქვს, დიდი ტკივილი. ყველაზე მნიშვნელოვანი კი რაცაა, ეს მხატვარმა ისე გადმოგვცა, ბოლომდე განვიცადე. მე პირადად, ყველა ნამუშევარში რაღაც ახალს ვპოულობ, რაც ამ ხნის მანძილზე მაკლდა და ეს ძალიან მახარებს.“ - გაგვანდო შთაბეჭდილება თამუნა ერაძემ.
გამოფენაზე, ძირითადად, წარმოდგენილი იყო ნახატები, რომლებიც ოთხმოციანი წლებიდან იქმნებოდა. ბატონი ავთანდილის თქმით, ბოლოს შარშან დახატა, რადგან სამსახურის გამო დრო აღარ რჩებოდა. ის დრო, რომელიც ძალიან მნიშვნელოვანი იყო, დრო, რომელიც გავიდა.