მურთაზ კანკაძის პოეტური კრებული

სპონსორი: PSnewsGE

2012/02/06 14:17:13

„ჩემი მწვერვალი მიმელის მაღლა“ - ასე ჰქვია მურთაზ კანკაძის ახალ წიგნს, რომელიც ამ დღეებში მიიღო მკითხველმა.

გაზეთ „წყალტუბოს“ რედაქტორს, სერგეი მესხის სახელობის პრემიის ლაურეატს, ღირსების ორდენის კავალერს მურთაზ კანკაძეს საზოგადოება იცნობს, როგორც ღვაწლმოსილ ჟურნალისტს, ბუნების მესაიდუმლე ხელოვანს (ქვებისა თუ ხის ფესვებისაგან შექმნილი მისი უმშვენიერესი ფიგურები და კომპოზიციები ყველას აღაფრთოვანებს), მაგრამ შეიძლება ბევრმა არ იცოდეს, რომ იგი საინტერესო პოეტიცაა. მისი ლექსების პირველი წიგნი „აღმართი“ 1993 წელს გამოვიდა, ეს კი მისი მეორე, სრული კრებულია: შიგ შეტანილია როგორც ახალი, ასევე - ადრე დაწერილი ნაწარმოებები, საბავშვო ლექსები, უცხოელ პოეტთა ავტორისეული თარგმანები, ასევე მეგობარ პოეტთა მიერ რუსულად თარგმნილი მისი ლექსები.

ჯერ კიდევ წლების წინ მწერალი და მეცნიერი სერგო ჭეიშვილი ასე აფასებდა მის შემოქმედებას: „მურთაზ კანკაძის ლექსებში იგრძნობა დაკვირვებული მხატვრის, მოაზროვნე პოეტის, სამშობლოზე, ადამიანზე, სიცოცხლეზე წრფელად შეყვარებული კაცის აჩქარებული მაჯისცემა.“

ამ ხაზს და მიმართულებას დღესაც გულწრფელი კალმით განაგრძობს ავტორი.

გთავაზობთ რამდენიმე ლექსს სერიიდან „სურათები.“***

ცას შედგომიან ბურჯებად მთები,

არ ეშინიათ პაპანაქების,

თავზე ახურავთ თეთრი ფიფქები,

ვით იმერული ფაფანაკები.

***

ბინდი ჩამოწვა ცისფერ ნაპირზე

და აშრიალებს ნიავი იფნებს,

მთვარე კი მდორე ტბის ზედაპირზე

წერს ლერწმის ჩრდილთა

იეროგლიფებს.