დღეს საქართველოს რეგიონული განვითარებისა და ინფრასტრუქტურის მინისტრმა დავით ნარმანიამ და მისმა მოადგილემ შოთა მურღულიამ ზესტაფონი-ქუთაისი-სამტრედიის ავტომაგისტრალზე მიმდინარე სამშენებლო სამუშაოები მოინახულეს.
ზესტაფონი-სამტრედიის გზის მონაკვეთზე სამუშაოების დასრულება 2013 წლის დეკემბრის ბოლოსთვისაა დაგეგმილი, ხოლო ქუთაისი-სამტრედიის გზის მშენებლობა 2014 წელს უნდა დასრულდეს.
ამ ეტაპზე, გზის სამშენებლო სამუშაოები მიმდინარეობს ნახშირღელე-გეგუთის 17 კილომეტრიან და გეგუთი-სამტრედიის 19 კილომეტრიან მონაკვეთზე. მშენებარე ავტომაგისტრალის ამ მონაკვეთზე, ასევე, დაგეგმილია 4 გზაგამტარისა და 4 ხიდის, მათ შორის - ერთი 800 მეტრიანი ხიდის მშენებლობა.
ზესტაფონი-სამტრედიის ავტომაგისტრალის მშენებლობის პროექტის ჯამური ღირებულება 360 მილიონ ლარს შეადგენს, საიდანაც მიმდინარე წელს 93 მილიონი ლარი უნდა დაიხარჯოს.
სამშენებლო სამუშაოებს კომპანია „ტოდინი ტაკენაკა“ კომპანიებთან - „აკორდთან“ და „ბორანი მაინინგთან“ ერთად ახორციელებს. როგორც კონტრაქტორი კომპანიები აცხადებენ, მშენებლობა გრაფიკის მიხედვით მიმდინარეობს და ამ მხრივ შეფერხება არ აქვთ. ამ დროისთვის დაგეგმილი სამუშაოების 60%-ზე მეტი უკვე შესრულებულია.