ევროკავშირთან ასოცირების ხელშეკრულების გაფორმებასთან დაკავშირებით "ერთიანი ნაციონალური მოძრაობის" ცენტრალურ ოფისში საზეიმო მიღება მიმდინარეობს .
შეკრებილნი არიან პარტიის ლიდერები და მხარდამჭერები. მათ შორის მიღებაში მონაწილეობენ ყოფილი თანამდებობის პირები, რომლებიც თავის დროზე უშუალოდ იყვნენ ქართული მხრიდან ევროკავშირთან ასოცირების შეთანხმებაზე ხელმოწერის პროცესში ჩართული.
დღევანდელი დღის მნიშვნელობის შეფასებისას "ნაციონალური მოძრაობის" ლიდერების მხრიდან აღინიშნა, რომ საქართველო ღირსეული შრომითა და ერთიანობით, ევროპისკენ მიმავალ გზას ბოლომდე გაივლის და საბოლოოდ გაერთიანების წევრი გახდება. მათივე თქმით, საქართველო ბრუნდება იქ, სადაც არის მისი ადგილი – ერთიან, ძლიერ ევროპაში.
"ჩვენ ვბრუნდებით იქ, სადაც ჩვენი ადგილია, ევროპულ ოჯახში. მნიშვნელოვანი ნაბიჯი გაფორმდა დღეს. ეს მისია არ არის დასრულებული და დიდი იმედი მაქვს, რომ მთელ ქართულ საზოგადოებასთან ერთად გადაიდგმება კიდევ უფრო მნიშვნელოვანი ნაბიჯი, რასაც ჰქვია საქართველოს გაწევრიანება ევროკავშირში და ნატო-ში. ეს არის იმ ამოცანის შესრულება, რასაც მრავალი თაობა შეიწირა და რაზეც მრავალი თაობა ოცნებობდა", - განაცხადა "ნაციონალური მოძრაობის" ერთ-ერთმა ლიდერმა გიგა ბოკერიამ.
დღევანდელ დღესთან დაკავშირებით შესრულდა საქართველოსა და ევროკავშირის ჰიმნი, ასევე გაიჭრა საქართველო-ევროკავშირის დროშებით გაფორმებული ტორტი.



წყარო: interpressnews.ge