საქართველოს მოსწავლე-ახალგაზრდობის ეროვნულ სასახლეში, დღეს ქუთაისის #17 საჯარო სკოლა აშშ-ს დამოუკიდებლობის 238-ე წლისადმი მიძღვნილ ღონისძიებას გამართავს.
როგორც "ინტერპრესნიუსს" აშშ-ს საელჩოდან აცნობეს, სკოლის საბაზო და საშუალო საფეხურის მოსწავლეები განათლების სამინისტროსა და PH-International-თან ერთად განხორციელებული წარმატებული პროექტების პრეზენტაციის შემდეგ პერფომანსს I have a dream გამართავენ, რომლითაც შეერთებული შტატების ისტორიას გააცოცხლებენ. შესრულდება კლასიკური და ჯაზური კომპოზიციები სკოლის პედაგოგებისა და მოსწავლეების მიერ. ღონისძიებაზე დასწრება ნებისმიერი მსურველისათვის თავისუფალია.
ღონისძიების სტუმრები იქნებიან: დიპლომატიური კორპუსის წარმომადგენლები, ბრიტანეთის საბჭო, საქართველოს განათლების სამინისტრო, სამოქალაქო განათლებისა და პედაგოგთა გადამზადების პროგრამის ხელმძღვანელობა, საქართველოს ეროვნული კინემატოგრაფიის ცენტრის და პროექტის "კინო სკოლაში" დირექტორები, თეატრალური საზოგადოება, უმაღლესი საგანმანათლებლო დაწესებულებების პროფესორ-მასწავლებლები, სტუდენტები, პედაგოგები, მოსწავლეები და მშობლები.


წყარო: interpressnews.ge