საგარეო საქმეთა სამინისტროში ჩატარებული კონკურსის შედეგად, სამინისტროში მომუშავე 18 დიპლომატის პირველი როტაცია განხორციელდება.
საგარეო საქმეთა სამინისტროს ინფორმაციით, საზღვარგარეთ საქართველოს დიპლომატიურ წარმომადგენლობებსა და საკონსულო დაწესებულებებში როტაციის წესით სამუშაოდ წარსაგზავნი დიპლომატიური თანამდებობის პირების შესარჩევმა კომისიამ შიდა კონკურსი ჩაატარა, საზღვარგარეთ საქართველოს დიპლომატიური წარმომადგენლობების საროტაციო თანამდებობებზე.
კომისიამ საროტაციო თანამდებობისა და მსურველი კანდიდატების შესაბამისი განაცხადები განიხილა. შედეგად, 23 თანამდებობაზე შესაბამისი კანდიდატურები შეარჩია.
შერჩეული 23 კანდიდატიდან 18 დიპლომატისთვის ეს იქნება პირველი როტაცია მისი დიპლომატიურ სამსახურში მუშაობის განმავლობაში, ხოლო დანარჩენ 5 შერჩეულ კანდიდატს უკვე აქვს სხვა ქვეყნებში როტაციაში ყოფნის გამოცდილება.
შესარჩევი კომისიის შემადგენლობაში საგარეო საქმეთა მინისტრი მაია ფანჯიკიძე, მინისტრის მოადგილეები და ცალკეული დეპარტამენტის ხელმძღვანელები შედიან.

წყარო: interpressnews.ge