საპარლამენტო უმცირესობა და უმრავლესობა უკრაინის საკითხთან დაკავშირებით რეზოლუციის პროექტის ტექსტზე ჯერჯერობით ვერ შეთანხმდა. მცდელობა მთელი დღის განმავლობაში პარლამენტში მიმდინარეობდა, თუმცა გადაწყვეტილება ჯერჯერობით მიღებული არ არის.
საპარლამენტო უმცირესობის წევრთა განცხადებით, დეპუტატების ნაწილი "ნაციონალური მოძრაობის" მიერ შეთავაზებულ ტექსტზე თანახმაა, თუმცა უმრავლესობის ნაწილი უმცირესობის მიერ ბიუროზე დარეგისტრირებულ ტექსტს არ ეთანხმება.
"სავარაუდოდ, უმრავლესობა რეზოლუციის ტექსტთან დაკავშირებით ორ რამეზე ვერ თანხმდება, ეს ეხება რუსეთთან დაკავშირებულ სანქციებს და ყირიმის დეოკუპაციის მოთხოვნის ფონზე საქართველოს დეოკუპაციის მოთხოვნას. არ ვიცი, რას გადაწყვეტს უმრავლესობა, რადგან ამასთან დაკავშირებით პარლამენტში კონსულტაციები ისევ გრძელდება", - აცხადებს პარლამენტში უმცირესობის ერთ-ერთი ლიდერი გოკა გაბაშვილი.


წყარო: interpressnews.ge