თბილისის უფლებამოსილებაშეჩერებული მერი გიგი უგულავა "საჯარო სამსახურის შესახებ" კანონში შეტანილ ცვლილებასთან დაკავშირებით საკონსტიტუციო სარჩელს ამზადებს.
ამის შესახებ უგულავამ "რუსთავი 2"-ის გადაცემა "პოზიციაში" განაცხადა. უგულავამ ისაუბრა პარლამენტის მიერ მიღებულ კანონზე, რომლის თანახმადაც ადგილობრივ თვითმმართველობებში კონკურსით დანიშნული ყველა თანამშრომელი, არჩევნების შემდეგ მოვალეობის შემსრულებლად გამოცხადდება. უგულავამ ეს პოლიტიკური ნიშნით ადამიანების გათავისუფლებად შეაფასა, რათა შემდეგ ახალი კადრები ნეპოტიზმის ნიშნით დაინიშნონ.
"ღარიბაშვილმა და ბატონმა კალაძემ აღიარეს, რომ საკუთარი პოლიტიკური აქტივისტებისთვის უნდათ ეს ადგილები. ცენტრალური მთავრობის ყველა შტო გავსებულია ნათესაური ნიშნით. რეკორდსმენი მაინც ღარიბაშვილია, შემდეგ ამ თვალსაზრისით მეორე საპრიზო ადგილს კალაძე იკავებს. ამ კანონის ეს მუხლი რომ ველურობაა, იმითაც დასტურდება, რომ მხოლოდ ერთხელ, 2014 წლის არჩევნებისთვის კეთდება. ვამზადებთ საკონსტიტუციო სარჩელს ამასთან დაკავშირებით და აუცილებლად მოვითხოვთ, რომ ამ მუხლის ანულირება მოხდეს", - განაცხადა უგულავამ.
აღნიშნული ნორმის გასაჩივრებას საკონსტიტუციო სასამართლოში არასამთავრობო სექტორიც გეგმავს.


წყარო: interpressnews.ge