ნოდარ ხადური "ჯეოსელში" მიმდინარე საგამოძიებო მოქმედებებში პოლიტიკურ მოტივს გამორიცხავს
ფინანსთა მინისტრი ნოდარ ხადური "ჯეოსელში" საგამოძიებო მოქმედებებისთვის პოლიტიკური ელფერის მიცემის მცდელობაში ოპონენტებს ადანაშაულებს.
როგორც ხადურმა ჟურნალისტებს თემის კომენტირებისას განუცხადა, გამოძიება თავად გაასაჯაროებს იმ ინფორმაციას, რაც გამოძიების მიმდინარეობას ხელს არ შეუშლის.
"ვფიქრობ, ჩვენი ოპონენტები ცდილობენ, საგამოძიებო მოქმედებებს პოლიტიკური ელფერი მისცენ. ძიებას მხოლოდ ფინანსური მიმართულება აქვს და არაფერი საერთო არ აქვს იმ ეჭვებთან და მოსაზრებებთან, რომელიც ჩვენს ოპონენტებს გააჩნიათ. ჩვენ უნდა მივეჩვიოთ იმას, რომ გამომძიებლები მუშაობენ და კომპანიის საქმიანობას ხელი არ ეშლება", - აღნიშნა ხადურმა.
მობილური კავშირგაბმულობის კომპანია "ჯეოსელში" ფინანსთა სამინისტროს საგამოძიებო სამსახური რამედნიმე დღის წინ შევიდა. კომპანიაში საგამოძიებო მოქმედებები ამ დრომდე გრძელდება.
წყარო:
interpressnews.ge