გიორგი მარგველაშვილი - ბიუჯეტი არ გვაძლევს იმის შესაძლებლობას, რომ ფეშენებელურ სასახლეებში ვიცხოვროთ
საქართველოს ბიუჯეტი არ გვაძლევს იმის შესაძლებლობას, რომ სახელმწიფო მოხელეებმა ფეშენებელურ სასახლეებში ვიცხოვროთ, ან ფეშენებელური ინაუგურაციები მოვაწყოთ
, - ამის შესახებ ჟურნალისტებს ახლად არჩეულმა პრეზიდენტმა, გიორგი მარგველაშვილმა განუცხადა.
მისივე განმარტებით, აღნიშნულის გამო მისი ინაუგურაცია პომპეზური არ იქნება. აღსანიშნავია, რომ ღონისძიების ფარგლებში მარგველაშვილი ქართველ ხალხს სიტყვითაც მიმართავს.
"ეს იქნება მადლიერება იმასთან დაკავშირებით, როგორც ჩატარდა არჩევნები და როგორ გვენდო ქართველი ხალხი. იქნება მომავალ გეგმებზე საუბარი... ჩვენ ვზეიმობთ არა მხოლოდ დღესასწაულებით, არამედ ყოველ დღე, როდესაც ვაშენებთ კარგ და სწორ და ჯანსაღ ქვეყანას, მაგრამ ხარჯები უნდა იყოს იმის შესაბამისი, რაც არის ბიუჯეტი. სამწუხაროდ, საქართველოს ბიუჯეტი არ გვაძლევს დღეს იმის შესაძლებლობას, რომ ფეშენებელურ სასახლეებში ვიცხოვროთ სახელმწიფო მოხელეებმა, ან ფეშენებელური ინაუგურაციები მოვაწყოთ", - აღნიშნა მარგველაშვილმა.
ამასთან, ახლად არჩეული პრეზიდენტის განმარტებით, "ეს ფული სჭირდება ქართველ ხალხს".
"სამწუხაროდ, ჯერ კიდევ ბევრი გაჭირვებულია, ვისაც ჯობია რომ ეს ფული დავახარჯოთ", - დასძინა ახლადარჩეულმა პრეზიდენტმა.
წყარო:
interpressnews.ge