საქართველოს პრეზიდენტის ადმინისტრაციის უფროსთან, გიორგი აბაშიშვილთან ერთად ცხინვალიდან დევნილმა ახალგაზრდებმა კონსტიტუციის ვიდეო-ჩანაწერი გააკეთეს. პრეზიდენტის ადმინისტრაციის ინფორმაციით, ამ გზით ურეკის საზაფხულო სკოლის მოსწავლეები პრეზიდენტის სარეზერვო ფონდის მხარდაჭერით ახალი მასშტაბური პროექტის "წაიკითხე კონსტიტუცია მთელ საქართველოსთან ერთად" მონაწილეები გახდნენ.

გიორგი აბაშიშვილის განცხადებით, მნიშვნელოვანია, რომ საზაფხულო სკოლებში ახალგაზრდები მსჯელობენ ისეთი ტიპის სახელმწიფოს მშენებლობის საკითხზე, რომელიც მაქსიმალურად თავისუფალია კონფლიქტებისგან და სადაც მოქალაქეობრივი პასუხისმგებლობა ძალიან მაღალია.

„ახალგაზრდები მსჯელობენ ისეთი ტიპის სახელმწიფოს მშენებლობის საკითხზე, რომელიც იქნება მაქსიმალურად თავისუფალი კონფლიქტებისგან, სადაც მოქალაქეობრივი პასუხისმგებლობა იქნება განსაკუთრებით მაღალი, ამავდროულად მნიშვნელოვანია, რომ ცხინვალის რეგიონიდან დევნილი ახალგაზრდები ძალიან აქტიურად ჩაერთნენ კამპანიაში "წაიკითხე კონსტიტუცია მთელ საქართველოსთან ერთად", - განაცხადა გიორგი აბაშიშვილმა.
საზაფხულო სკოლა "მოსწავლეთა სამოქალაქო განათლებისა და ჩართულობისათვის" პრეზიდენტის სარეზერვო ფონდის ხელშეწყობით ხორციელდება, რომელიც 2008 წლის ომის შედეგად დევნილ მოზარდებსა და ომის ვეტერანთა შვილებს აერთიანებს. პროექტის ფარგლებში დაგეგმილია ტრენინგები და სემინარები მოსწავლეთა სამოქალაქო განათლების და ჩართულობისათვის, კულტურული, შემოქმედებითი და სპორტული ღონისძიებები.

წყარო: interpressnews.ge