საქართველოს პრეზიდენტი დღეს სხვადასხვა რელიგიური კონფესიების წარმომადგენლებს შეხვდა. როგორც "ინტერპრესნიუსს" პრეზიდენტის ადმინისტრაციიდან აცნობეს , შეხვედრაზე საუბრის მთავარი თემა ბოლო დროს ქალთა მიმართ ძალადობის გახშირებული ფაქტები და მათი პრევენცია იყო.
ქვეყნის პირველმა პირმა სასულიერო ლიდერების მოსაზრება მოისმინა, თუ როგორ შეიძლება აღნიშნული პრობლემის მოგვარება. მხარეები შეთანხმდნენ, რომ აუცილებელია კომპლექსური სამუშაოების შესრულება. საუბარი შეეხო ამ მხრივ სხვადასხვა საგანმანათლებლო პროექტების განხორციელებას. ასევე ითქვა, რომ აღნიშნულ პრობლემას სახელმწიფოს მხრიდან მეტი ყურადღება უნდა დაეთმოს. სასულიერო პირების განცხადებით, საკუთარ მრევლთან ამ მიმართულებით მუშაობას გააღრმავებენ.
"ჩვენ შევხვდით საქართველოში მოღვაწე სასულიერო ლიდერებს იმ ტრაგედიებთან დაკავშირებით, რომლებიც, სამწუხაროდ, ჩვენს საზოგადოებაში უკვე ტენდენციად ჩამოყალიბდა. ერთმანეთს გავუზიარეთ ის ტკივილი, რომელიც ყველას ერთად გვაწუხებს და გადავწყვიტეთ, რომ, უპირველესად, ჩამოვაყალიბოთ სამოქმედო გეგმა, უფრო გრძელვადიანი. იყო ასეთი იდეაც, რომელსაც მე მხარი დავუჭირე, რომ 2015 წელი გამოცხადდეს ქალის წლად და ამ ძალიან დიდ პრობლემას ერთობლივად დავუპირისპირდეთ. ერთი მხრივ, ჩემს რიტორიკაში ყოველთვის ხაზგასმით აღვნიშნავ ამ პრობლემას. მეორე მხრივ, თავის ქადაგებებში ყველა სარწმუნოება გააქტიურებს ამ საკითხს. მესამე - ჩვენი შეხვედრა დავიწყეთ იმით, რომ ჩვენ ავიღეთ ის წილი პასუხისმგებლობა, რომელიც აქვს სახელმწიფოს. თუმცა, გავიაზრეთ ისიც, რომ მარტო სახლმწიფო ამას ვერ დაძლევს და საჭიროა ერთად დგომა. იმედი მაქვს ეს პოზიტიურად აისახება პრობლემის მოგვარებაზე", - განაცხადა საქართველოს პრეზიდენტმა.
შეხვედრას პირველი ლედი მაკა ჩიჩუაც ესწრებოდა, რომელმაც აღნიშნა ქალთა მიმართ ძალადობის აღმოსაფხვრელად სერიოზული ნაბიჯებია გადასადგმელი.


წყარო: interpressnews.ge