საქართველოს სჭირდება პატრიოტი, გულანთებული მოქალაქეები, რომლებიც მზად იქნებიან ნებისმიერ შემთხვევაში ქვეყნის დამოუკიდებლობა დაიცვან , – ამის შესახებ თავდაცვის მინისტრმა ირაკლი ალასანიამ დიასპორის ეკონომიკური ფორუმის დასრულების შემდეგ ჟურნალისტებს განუცხადა.
მისი თქმით, დიასპორებს დიდი წვლილი შეაქვთ საქართველოს განვითარებაში, მათ შორის ეკონომიკური კუთხით.
"ჩვენგან წასული დიასპორის წარმომადგენლები ძალიან ეხმარებიან თავიანთ ოჯახებს და ძალიან კარგია საქართველოს ფინანსური განვითარებისთვის. მთავარია მოვახერხოთ ყველა გზა გავხსნათ მათი ჩართულობისთვის, რომ ქვეყნის პოლიტიკურ-სოციალურ განვითარებაში მიიღონ მონაწილეობა. ძალიან მიხარია, რომ ასეთი მიზიდულობა გაჩნდა სამშობლოს მხრიდან დიასპორების მიმართ იმიტომ, რომ საქართველოს სჭირდება პატრიოტი, გულანთებული მოქალაქეები, რომლებიც მზად იქნებიან ნებისმიერ შემთხვევაში ქვეყნის დამოუკიდებლობა დაიცვან", - განაცხადა ალასანიამ.
სასტუმრო "შერატონ მეტეხი პალასში" დიასპორის ეკონომიკური ფორუმი გაიმართა, რომელიც დიასპორის საკითხებში სახელმწიფო მინისტრმა გელა დუმბაძემ განხსნა. ფორუმზე სიტყვით გამოვიდა პრემიერ-მინისტრი ირაკლი ღარიბაშვილი. ფორუმს მინისტრთა კაბინეტის და დიპლომატიური კორპუსის წარმომადგენლები ესწრებოდნენ.


წყარო: interpressnews.ge