საქართველოს პრეზიდენტი მთავარი პროკურატურის მიერ პროკურატურასა და პრეზიდენტის ადმინისტრაციას შორის საიდუმლო მიმოწერის გასაჯაროების გამო შეშფოთებას გამოთქვამს, - ამის შესახებ ნათქვამია გიორგი მარგველაშვილის განცხადებაში, რომელიც პრეზიდენტის ოფიციალურ გვერდზე გამოქვეყნდა.
"გამოვთქვამთ შეშფოთებას იმის გამო, რომ პროკურატურამ, სახელმწიფო საიდუმლოების შესახებ საქართველოს კანონის დარღვევით, გაასაჯაროვა საიდუმლო მიმოწერა მთავარ პროკურატურასა და პრეზიდენტის ადმინისტრაციას შორის. სახელმწიფო საიდუმლოების შესახებ საქართველოს კანონის თანახმად, "პრესაში და მასობრივი ინფორმაციების სხვა საშუალებებში სახელმწიფო საიდუმლოების გამჟღავნების შედეგებზე მეთვალყურეობას ახორციელებს საქართველოს შინაგან საქმეთა სამინისტრო". შესაბამისად, მივმართავთ საქართველოს შინაგან საქმეთა სამინისტროს უზრუნველყოს ზემოაღნიშნული ვალდებულების შესრულება. დამატებით აღვნიშნავთ, რომ ამავე კანონის მიხედვით, თანამდებობის პირსა და საჯარო მოხელეს, რომელიც დაარღვევს სახელმწიფო საიდუმლოების დაცვის ვალდებულებას, დაეკისრება კანონით დადგენილი პასუხისმგებლობა", - ნათქვამია პრეზიდენტის განცხადებაში.
რაც შეეხება უშუალოდ სახელმწიფო დაცვის სპეციალური სამსახურის ხარჯებთან დაკავშირებულ დოკუმენტაციას, პრეზიდენტის ადმინისტრაციის ინფორმაციით, პროკურატურის მიერ ნახსენებ დოკუმენტაციას უკვე მოეხსნა გრიფი "საიდუმლო".
"ინტერპრესნიუსს" დღეს მთავარ პროკურატურაში განუცხადეს, რომ სახელმწიფო დაცვის სპეციალური სამსახურის ხარჯებთან დაკავშირებულ საქმეს გრიფი "საიდუმლო" მოეხსნა, თუმცა გრიფი "საიდუმლო" რჩება მხოლოდ საქმის მცირე ნაწილს, რის მოხსნასთან დაკავშირებითაც პროკურატურამ პრეზიდენტს უკვე მიმართა. კონტრდაზვერვის სამსახურის დასკვნის მიხედვით, საქმეს გრიფი არასწორად ჰქონდა დადებული. საქმე ეხება სახელმწიფო დაცვის სპეციალური სამსახურის მიერ წინა ხელისუფლების დროს გაწეულ ხარჯებს, რომელთა ნაწილის შესახებ ინფორმაცია დაახლოებით ერთი წლის წინ საზოგადოებას უშიშროების საბჭოს მდივანმა და პარლამენტის საპროცედურო საკითხთა კომიტეტის ყოფილმა თავმჯდომარე ირინა იმერლიშვილმა მიაწოდა. არსებული ინფორმაციით, სდსს-ის ბიუჯეტიდან თანხების არამიზნობრივად ხარჯვა ხდებოდა, რა საქმეზეც გამოძიება მიმდინარეობს.



წყარო: interpressnews.ge