რატომ არ სჯერა 74 წლის სოციალურად დაუცველ არჩილ მარგველაშვილს ხელისუფლების დაპირების?
ქუთაისში, ნიკეას პირველ შესახვევში მცხოვრები სოციალურად დაუცველი, მეორე ჯგუფის შრომის ინვალიდი, მარტოხელა 74 წლის არჩილ მარგველაშვილი დახმარებას ითხოვს. არჩილ მარგველაშვილი ერთოთახიან ბინაში მარტო ცხოვრობს. მეუღლე 4 წლის წინ დაეღუპა, ერთადერთი ვაჟი კი 22 წლის ასაკში, 9 აპრილის ტრაგედიას შეეწირა. როგორც 74 წლის სოციალურად დაუცველი არჩილ მარგველაშვილი ამბობს, ის წლებია მეზობლის დაუდევრობის მსხვერპლია. ზემოდან ჩამოსული წყალი მის საცხოვრებელს აზიანებს.
„ძალიან ვიწრო ოთახი მაქვს, შეჭირვებულად ვცხოვრობ. ისედაც რთულ პირობებში ვარ, არავინ მაქცევს ყურადღებას და ამას მეზობლის დაუდევრობა ემატება. წლებია, წყალი ნიაღვარივით ჩამომდის ოთახში. ჩამომივარდა ჭაღი, გაშავდა და გაფუჭდა კედლები და იატაკი, დამისველდა ტანსაცმელი და დღეს არაფერი არ მაქვს, რომ ჩავიცვა, რაც გადაურჩა გაფუჭებას, სულ ის მაცვია და მეშინია, ისიც არ გამიფუჭდეს. სველი ტანსაცმლის გასაშრობად ადგილიც არ მაქვს.
ყველაფერი გამიფუჭდა და მალე უსახლკაროდაც დავრჩები, თუ მეზობელი ყურადღებას არ გამოიჩენს და წყლის ჩამოშვებას ისევ გააგრძელებს,“ - განაცხადა არჩილ მარგველაშვილმა.
როგორც არჩილ მარგვლაშვილი იხსენებს, 2009 წელსაც ანალოგიური პრობლემის წინაშე აღმოჩნდა. მეზობელ თამაზ ყურაშვილის გულგრილობის გამო, იძულებული გახდა, სასამართლოსთვის მიემართა. 2009 წლის 20 მაისს გამართული სასამართლო პროცესი მარგველაშვილის გამარჯვებით დასრულდა. თამაზ ყურაშვილს კი ზარალის ასანაზღაურებლად ჯარიმა 317 ლარი და 82 თეთრი დაეკისრა.
„მესამე სართულიდან დიდი ხნის წინ დაიწყო წყლის ჩამოშვება მეზობელმა, რომელიც დროებით ქირით ცხოვრობდა, ვერაფერს გავხდი და იძულებული ვიყავი, მეჩივლა. თანხა სასამართლოს შემდეგ კი გადამიხადა და თვითონ გადავიდა იმ ბინიდან, მაგრამ მალევე გაიყიდა ის საცხოვრებელი და ამჯერად ახალ მდგმურთან მიწევს ბრძოლა, რომლის სახელი და გვარიც კი არ ვიცი, ბინის მეპატრონეს სულ არ ადარდებს, რა მომივა. ადამიანურმა თხოვნამ კი წლებია არანაირი შედეგი არ გამოიღო.“
არჩილ მარგველაშვილმა, მეზობლისგან წყლის ჩამოშვების ბოლო ფაქტის შემდეგ, უბნის ინსპექტორს მიმართა, რომელმაც ურჩია, რომ ახალგაზრდა იურისტთა ასოციაციის ქუთაისის ფილიალში მისულიყო და დახმარება მათთვის ეთხოვა. როგორც მარგველაშვილი ამბობს, „საია“-მ ექსპერტთან გადაამისამართა, რომელიც სასამართლო პროცესზე დახმარებას აღმოუჩენდა. როგორც მარგველაშვილი ჰყვება, მას არ აქვს საშუალება ექსპერტის მომსახურებისთვის საჭირო 500 ლარი გადაიხადოს, რის გამოც მარტოხელა მარგველაშვილი იძულებულია მეზობლის დაუდევრობას მარტო ებრძოლოს.
„რადგან სოციალურად დაუცველი ვარ სასამართლო იჯარას არ მახდევინებს, მაგრამ მითხრეს, რომ ამ მდგომარეობაში მარტო ექსპერტს შეუძლია დამეხმაროს და სასამართლო მოგაგებინოსო. სოციალურად დაუცველი ვარ და 500 ლარი ჩემთვის ძალიან დიდი ფუფუნებაა. დავდივარ და გამოსავალი ვერსად მიპოვია. ბინის მეტი არაფერი არ გამაჩნია, კიდევ რომ ჩამომივიდეს წყალი, ალბათ, გული გამისკდება ნერვიულობით, პატრონი მე არ მყავს და დამაცადონ დარჩენილი სიცოცხლე მშვიდად გავატარო, ვის რას ვუშავებ. ერთი პერიოდი ვიფიქრე, იქნებ სოციალური სტატუსის გამო, არ გადამახდევინონ თანხა-მეთქი, მაგრამ ეს შენი სტატუსი არ ჭრისო მითხრეს და ის 500 ლარი არ ამინაზღაურეს. სიტყვით ვერაფერი გამივიდა და მეგონა, სამართლით მაინც მივაღწევდი რამეს, მაგრამ სამართალიც ძვირი ყოფილა.“
არჩილ მარგველაშვილი ცდილობს, პრესის საშუალებით მიაწვდინოს ხმა მეზობელს, რომ მარტოხელა პენსიონერის მიმართ მეტი ყურადღება გამოიჩინოს, ხელისუფლებას კი ერთჯერად დახმარებას თხოვს.
როგორც მარგველაშვილი იხსენებს, ერთჯერადი დახმარების თხოვნით უბნის მაჟორიტარ-დეპუტატს ირმა პეტრიაშვილს მიმართა. დეპუტატიც დაჰპირდა, რომ 2015 წლის თებერვალ-მარტის თვეში, როდესაც ქუთაისის ბიუჯეტი საბოლოოდ გაწერილი იქნება, შეეცდება, რაიმე დახმარება გამოუყონ. თუმცა, გულგრილ დამოკიდებულებას მიჩვეულ მარგველაშვილს ხელისუფლების წარმომადგენელთა დაპირებების იმედი აღარ აქვს...