ჩეხეთის განვითარების სააგენტოს დახმარება სოციალურად დაუცველ ახალგაზრდებს
ორგანიზაცია „People in Need“ (PIN) და საქართველოს სოციალურ მუშაკთა ასოციაციამ, 12 დეკემბერს თბილისში სასტუმრო „ჰოლიდეი-ინ“-ში პროექტის „სოციალურად დაუცველი ახალგაზრდებისა და მათი ოჯახის წევრების მხარდაჭერა დასავლეთ საქართველოში“, შემაჯამებელი კონფერენცია გამართა. კონფერენციაზე წარმოდგენილი იყო სამწლიანი პროექტისა და სამი საპილოტე პროგრამის მუშაობის შედეგები.
ორგანიზაციის მიერ განხორციელებული სამწლიანი პროექტი ჩეხეთის საგარეო საქმეთა სამინისტრომ დააფინანსა. კონფერენციაზე მოწვეულ სტუმართა შორის იყვნენ ტომაშ პერნიცკი - ჩეხეთის რესპუბლიკის ელჩი საქართველოში და ალბერტ შიდო - ატაშე, ჩეხეთის განვითარების სააგენტო; ნიკოლოზ მესხიშვილი, სოციალური პარტნიორობის ხელშეწყობის სამმართველოს უფროსი, საქართველოს განათლებისა და მეცნიერების სამინისტრო, საქართველოს სოციალურ მუშაკთა ასოციაცია, სოციალური პროგრამების, მეურვეობის და მზრუნველობის დეპარტამენტის ხელმძღვანელი, სსიპ სოციალური მომსახურეობის სააგენტო, ჯანმრთელობის, შრომისა და სოციალური დაცვის სამინისტრო.
2012 წლის მაისიდან 2014 წლის დეკემბრის ჩათვლით PIN-ის ორგანიზებით პროექტი დასავლეთ საქართველოს სამ მუნიციპალიტეტში: ტყიბულში, წყალტუბოსა და ქუთაისში მიმდინარეობდა.
პროექტი მიზნად ისახავდა სოციალურად დაუცველ ახალგაზრდობასთან მომუშავე ადგილობრივი მმართველობის ორგანოების, შესაბამისი სამსახურების და არასამთავრობო ორგანიზაციების წარმომადგენელთა უნარების ამაღლებას, სოციალური სერვისების მიწოდებისა და ახალი კონცეფციების დანერგის კუთხით; ასევე სიღარიბის ზღვარს ქვემოთ მყოფი ახალგაზრდების და მათი ოჯახის წევრების მხარდაჭერას დასავლეთ საქართველოში.
პროექტის პირდაპირ მიზნობრივ ჯგუფს წარმოადგენენ ახალგაზრდები სოციალურად შეჭირვებული მრავალსულიანი ან არასრული ოჯახებიდან, მცირე საოჯახო ტიპის სახლების ბენეფიციარები, სოციალური მუშაკები, სოციალური მეწარმეები და სოციალური სერვისის მიმწოდებელი სხვა დაინტერესებული პირები.
ორგანიზაციის მიერ განხორციელებული პროექტი სოციალური დახმარების სახელმწიფო პოლიტიკაში ცვლილებების ადვოკატირებას ისახავს მიზნად, რათა მოხდეს ახალგაზრდების მოტივაციის ამაღლება, რომ მათ წამოიწყონ საკუთარი საქმე. ახალი კონცეფციების დანერგვას, ახალგაზრდების სოციალურ-ეკონომიკური პირობების გაუმჯობესებას.
პირველი საპილოტე პროექტი განხორციელდა შრომის, ჯანმრთელობისა და სოციალურ საქმეთა სამინისტროსთან თანამშრომლობით, პროექტი განხორციელდა საქართველოს სოციალურ მუშაკთა ასოციაციის მიერ - „შემთხვევის მართვის ინდივიდუალური სისტემის დანერგვა იმერეთში“. პროექტში ჩართული იქნა 46 სოციალური მუშაკი და მცირე საოჯახო ტიპის სახლების თანამშრომლები (ქუთაისი, ხონი, სამტრედია), რომელთაც ჩაუტარდათ შესაბამისი ტრენინგები. შემთხვევის კონფერენციის საპილოტე მოდელი გაზიარებული და დამოუკიდებლად დანერგილ იქნა სოციალური სერვისების სააგენტოს მიერ.
მეორე საპილოტე პროექტი, ასევე განხორციელდა შრომის, ჯანმრთელობისა და სოციალურ საქმეთა სამინისტროსთან თანამშრომლობით. რაც ითვალისწინებდა მცირე საოჯახო სახლების ბენეფიციარებისთვის ინტეგრირებული სერვის-პაკეტის უზრუნველყოფას - ხელობის შემსწავლელი და სხვადასხვა უნარების ტრენინგებს, რაც დაეხმარებათ ახალგაზრდებს დამოუკიდებელი ცხოვრების დაწყებაში მცირე საოჯახო სახლების დატოვების შემდეგ. სოციალურ მუშაკთა ასოციაცია და სპორტისა და ახალგაზრდობის საქმეთა სამინიტროს ფარგლებში მოქმედ ეროვნულ ახალგაზრდულ ცენტრთან თანამშრომლობით PIN-მა იმერეთში აღნიშნული მომსახურეობით 15 ახალგაზრდა უზრუნველყო.
შემდგომი პროექტი განათლებისა და მეცნიერების სამინისტროსთან თანამშრომლობით - ხელობის შემსწავლელ ტრეინინგების მეთოდოლოგიასთან დაკავშირებით განხორციელდა. მიუხედავად იმისა, რომ პროფესიული განათლება ხელმისაწვდომია ყველასთვის, სახელმწიფო კოლეჯის დასრულების შემდეგ ყველა სტუდენტს არა აქვს თანაბარი შესაძლებლობა გამოიყენოს მიღებული ცოდნა და უნარები დასაქმებისთვის. არა აქვთ შესაძლებლობა შეისყიდონ მათი საქმიანობებისთვის საჭირო ინვენტარი და მოწყობილობები. PIN-ის მიერ ინიცირებული საპილოტე პროექტის ფარგლებში სახელმწიფო პროფესიული კოლეჯების კურსდამთავრებულებს (2013-2014), რომლებიც ასევე აღრიცხულნი იყვნენ სოციალურად დაუცველთა სახელმწიფო ბაზაში, შესაძლებლობა მიეცათ მონაწილეობა მიეღოთ საგრანტო პროგრამაში. საერთო ჯამში, ტყიბულსა და ქუთაისში გრანტით დაკმაყოფილდა 5 გამარჯვებული, რომელთაც გადაეცათ 5000 ლარის ღირებულების მოწყობილობები საკუთარი, იურიდიულად დარეგისტრირებული მცირე ბიზნესის დასაწყებად.
საერთო ჯამში, პროექტში 500-ზე მეტმა ახალგაზრდამ მიიღო მონაწილეობა და 400-ზე მეტ შეჭირვებულ ოჯახს გაეწია სოციალური მომსახურეობა. შეიქმნა 4 სოციალური საწარმო. 92-მა ახალგაზრდამ ხელობის შემსწავლელი კურსები გაიარა, ასევე მათგან 22 კურსდამთავრებული მცირე საგრანტო კონკურსის წარმატებით დასრულების შემდეგ დასაქმდა.
მცირე საოჯახო სახლის 14-მა ახალგაზრდამ გაიარა უნარ-ჩვევების ტრენინგი და ხელობის შემსწავლელი კურსები.
პროექტში მონაწილეებს საკუთარი საქმე გაუჩნდათ და სახელმწიფოზე დამოკიდებულნი აღარ არიან. რამდენიმე წელში ისინი თავად გახდებიან დამსაქმებლები და ადგილობრივი მოსახლეობისთვის სამუშაო ადგილებს შექმნიან.
„ადამიანი გაჭირვებაში“ არის ჩეხური არასამთავრობო ორგანიზაცია რომელიც საქართველოში მოქმედებს 2005 წლის მეორე ნახევრიდან. გააჩნია საკუთარი წარმომადგენლობები ქუთაისსა და თბილისში. 2008 წლიდან „ადამიანი გაჭირვებაში“ ორიენტირებულია სამოქალაქო საზოგადოების განვითარებაზე, განსაკუთრებით სამოქალაქო ინიციატივების მხარდაჭერაზე ადგილობრივ ხელისუფლებასთან მჭიდრო ურთიერთობით. ამასთანავე, ორგანიზაცია ხელს უწყობს ადამიანის უფლებებისა და დემოკრატიის განვითარებას. ორგანიზაციის საქმიანობები, ძირითადად, მოიცავს სოფლის მეურნეობას, ახალგაზრდების ჩართულობას და განათლებას. მიმდინარე პროექტები ხორციელდება იმერეთში, რაჭაში, შიდა ქართლში, კახეთსა და თბილისში. დონორებს შორის არიან ევროპული კავშირი, ჩეხეთის განვითარების სააგენტო და მსოფლიო ბანკი.