წყალტუბოს მუნიციპალური განვითარების ფონდი, მსოფლიო ბანკის დაფინანსებით, ქალაქ წყალტუბოში ათ სხვადასხვა მსხვილ ინფრასტრუქტურულ პროექტს ახორციელებს, რომლის საერთო ღირებულება შეადგენს 49 068161 ლარს.
ამჟამად დასრულებულია ოთხი მსხვილი პროექტი: ქ. წყალტუბოში საკანალიზაციო ქსელის რეაბილიტაცია, რომლისთვისაც გამოყოფილი იყო 3 550 000 ლარი, სამუშაო შეასრულა შპს „ინსმა“, ქ. წყალტუბოში სასმელი წყლის ქსელის რეაბილიტაცია, საცხოვრებელი კორპუსების და ახლოს მდებარე სოფლების გამრიცხველიანების სამუშაო, რომელიც შესრულებული იქნა სახელმწიფო სამშენებლო კომპანიის მიერ. აღნიშნული პროექტისათვის გამოყოფილი იყო 6 379 574 ლარი. წყალტუბოს კურორტის მართვის ოფისის, პარკში და ცივი ტბის მიმდებარე ტერიტორიაზე მცირე ზომის შენობა-ნაგებობის მშენებლობა, რომელიც შეასრულა შპს „დაგმა“ (ღირებულება: 5 948 597 ლარი), ასევე დასრულებულია „ცივი ტბისა“ და „ცივი ტბიდან“ გამომავალი არხების რეაბილიტაცია (ღირებულება 4 148000 ლარი, სამუშაოები აწარმოა შპს „აზერტუნელმა“), წყალსადენის სათავე ნაგებობის რეაბილიტაცია (ღირებულება 5 191 844 ლარი), სამუშაო აწარმოა შპს „წყალკანალრემმშენმა“.
ამ ეტაპზე მიმდინარეობს შემდეგი სამუშაოები: ცენტრალურ პარკში და „ცივ ტბაზე“ გარე განათების რეაბილიტაცია (ღირებულება 2 660 786 ლარი), სამუშაოს აწარმოებს სს „ერისიმედი“, შესრულებულია სამუშაოს 85%; ყოფილი პოლიციის შენობის, რკინიგზის სადგურის, საკონცერტო დარბაზ „ივერიის“, რკინიგზის სადგურის მიმდებარე მოედნისა და ცენტრალურ პარკში არსებული მცირე ზომის საფეხმავლო ხიდების რეაბილიტაციის სამუშაოები (ღირებულება 2 899 075 ლარი), შემსრულებელი შპს „ჯავა“, შესრულებულია სამუშაოს 30%; ცენტრალურ პარკში და „ცივ ტბაზე“ გზების, სავალი ბილიკებისა და სადრენაჟე სისტემის რეაბილიტაცია (ღირებულება 7 349 000 ლარი), სამუშაოს აწარმოებს შპს „დაგი“, შესრულებულია სამუშაოს 40%; წრიული გზების, სანიაღვრე და სადრენაჟე სისტემის რეაბილიტაცია (ღირებულება 5 917127 ლარი), შემსრულებელი შპს „ცეკური“, შესრულებულია სამუშაოს 90%; ქ. წყალტუბოს ცენტრალური პარკისა და „ცივი ტბის“ ტერიტორიის გამწვანება, კეთილმოწყობა და სარწყავი სისტემის მონტაჟი (ღირებულება: 3 161 900 ლარი), სამუშაოს აწარმოებს შპს „მწვანე სახლი“, შესრულებულია 30%.
თითქმის სამი წელია, რაც ქალაქ წყალტუბოს მუნიციპალიტეტის შენობა ხარაჩოშია ჩასმული.
გარკვეული პერიოდი რეაბილიტაციის პროცესი გაჩერებული იყო, ამჟამად კი აქტიური მუშაობა მიმდინარეობს შენობის იერსახის შესაცვლელად.
ქალაქის მუნიციპალიტეტის გამგეობის ადმინისტრაციული შენობის სახურავის სარეაბილიტაციო სამუშაოებისთვის 266 795 ლარია გამოყოფილი, სამუშაოებს შპს „ქართლი“ ასრულებს. როგორც წყალტუბოს გამგებელმა კონსტანტინე მამისეიშვილმა გვითხრა, გამგეობის შენობის რეაბილიტაცია 2014 წლის ბოლოს დასრულდება.
როგორც ცნობილია, პირველ ეტაპზე წყალტუბოს მუნიციპალიტეტის შენობა დასრულდება, რომელიც საახალწლოდ უნდა ჩაბარდეს, ხოლო სხვა დანარჩენ სარეაბილიტაციო სამუშაოებს 2016 წლის ბოლოს ექნება საბოლოო სახე.