წლიური ინფლაციის დონე, იანვარში არსებული 12.3%-დან, თებერვალში 13.7%-მდე გაიზარდა, რისი ძირითადი მიზეზიც სურსათზე და ტრანსპორტზე ფასების ზრდა გახდა, იტყობინება „საქსტატი“ 11 მარტს გამოქვეყნებულ მონაცემებში.
სურსათზე და უალკოჰოლო სასმელებზე ფასები 2011 წლის თებერვალში, შარშან ანალოგიურ პერიოდთან შედარებით, 28.4%-ით გაიზარდა, ხოლო 2011 წლის იანვართან შედარებით - 6%-ით. „საქსტატის“ მონაცემებით, თებერვალში სურსათის და უალკოჰოლო სასმელების წილმა წლიურ ინფლაციაში 11.7% შეადგინა.
საწვავზე ფასები თებერვალში, წინა თვესთან შედარებით, 5.2%-ით გაიზარდა; ხოლო ფასების წლიურმა ზრდამ ალკოჰოლურ სასმელებზე და თამბაქოზე 9.6% შეადგინა.
ფასების შემცირება დაფიქსირდა საკომუნიკაციო მომსახურეობაზე. ამ სექტორში, შარშანდელ თებერვალთან შედარებით, ფასები 7%-ით შემცირდა.
civil.ge