პარტია „პატრიოტთა ალიანსის“ ქუთაისის ორგანიზაციის თავმჯდომარემ გოჩა თევდორაძემ მის მიერ ადგილობრივი თვითმმართველობის მართვისა და უძრავი ქონების დიდი რაოდენობით უკანონოდ შეძენის შესახებ  გავრცელებული ინფორმაციის საპასუხოდ ბრიფინგი გამართა. თევდორაძემ ყველა იმ ბრალდებაზე ისაუბრა, რაც მისი მისამართით „ნაციონალების“ და არასამთავრობო ორგანიზაციების წარმომადგენლების მხრიდან ბოლო დროს ისმის.

თევდორაძე გაზეთ „პოსტსკრიპტუმში“ გამოქვეყნებულ მასალასაც გამოეხმაურა და განაცხადა, რომ მის სახელზე რეგისტრირებული ქონების ჩამონათვალი, რომელიც გაზეთმა გამოაქვეყნა, ძალიან მცირეა.

„ვკითხულობ გაზეთ „პოსტსკრიპტუმში“ რომ თურმე სხვადასხვა ადგილზე ვფლობ ქონებას. მინდა ვთქვა, რომ სხვაზე მეტი არაფერი მაქვს, თუმცა, არც ის განცდა მაქვს, რომ უსახლკარო უნდა ვიყო. თითოეულ თქვენგანს აქვს კორპუსის ქვეშ სარდაფი ან ავტომობილის დასაყენებელი ადგილი. ძალიან მწირია ის ჩამონათალი, რაც ჩემს  ქონებაზე აქვთ  ჟურნალისტებს. მათ კი, ვინც დაინტერესებულია ჩემი ქონებით და საზოგადოება შეცდომაში შეჰყავს, თავად მიისწრაფის თანამდებობისკენ.

„როგორ ვერევი მე ადგილობრივი თვითმმართველობის საქმეებში მაშინ, როცა მერიც და მერის მოვალეობის ორივე შემსრულებელი, რომლებიც პოსტებზე დაინიშნენ „ქართული ოცნების“ კადრები იყვნენ,“ – აცხადებს თევდორაძე.