საიტი მუშაობს ტესტირების რეჟიმში
საგარეჯოში გამგებელსა და მაჟორიტარს უპირისპირდებიან
საგარეჯოში გამგებელსა და მაჟორიტარს უპირისპირდებიან
ავტორი: როლანდ ხოჯანაშვილი
სულ ნანახია 1197
ავტორი:
როლანდ ხოჯანაშვილი

სოციალურ ქსელში ბოლო დროს აქტიურად ვრცელდება განცხადება, რომელიც ხელმოწერილია, დაახლოებით, 600 ადამიანის მიერ. განცხადებაში აღნიშნულია, რომ „გასული 2012 წლის საპარლამენტო არჩევნებში მიღწეული გამარჯვების შემდეგ ჩვენი რაიონის მაჟორიტარი დეპუტატის, თინა ხიდაშელის წარდგინებითა და რაიონის საკრებულოზე სერიოზული ზეწოლის შემდეგ, რაიონის გამგებლად დაინიშნა საზოგადოებისათვის სრულიად უცნობი ახალგაზრდა, გამოუცდელი პიროვნება გიორგი ლოლაძე. გავითვალისწინეთ რა თინა ხიდაშელის ავტორიტეტი პოლიტიკური გამოცდილება, პრინციპულობა და ობიექტურობა, წინააღმდეგობა არ გავუწიეთ გიორგი ლოლაძის გამგებლად დანიშვნაში, პირიქით, ერთსულოვანი მზადყოფნა გამოვთქვით, ყოველგვარი მხარდაჭერა აღმოგვეჩინა ახალგაზრდა პიროვნებისათვის, მაგრამ მან გამგეობაში მისვლისთანავე შემოიკრიბა თანაკლასელი, თანაჯგუფელი თუ სხვა მეგობრული ურთიერთობებით დაკავშირებული ადამიანები და ძალიან მალე ისინი გაერივნენ ფინანსურ მაქინაციებში, რასაც დიდი გამოხმაურება მოჰყვა და დიდი უარყოფითი გავლენა მოახდინა რაიონის მოსახლეობაზე.“

„ქართული ოცნების“ საარჩევნო შტაბის წევრები აცხადებენ, რომ გიორგი ლოლაძე უპასუხისმგებლოდ ეკიდებოდა მოსახლეობის მიერ დაყენებულ საკითხებს, ატარებდა არასწორ საკადრო პოლიტიკას და ფინანსურ მაქინაციებშიც გაეხვა. ამის გამო მაჟორიტარს შეხვდნენ და პრეტენზიები განუცხადეს ლოლაძის მისამართით, რაზედაც ასეთი პასუხი მიიღეს: „ან გიორგი ლოლაძე იქნება გამგებელი და რაიონში წამოვა ინვესტიციები, წინააღმდეგ შემთხვევაში რაიონში არაფერი არ გაკეთდება!“

 კოალიცია „ქართული ოცნების“ საგარეჯოს საოლქო საარჩევნო შტაბისა და აქტივის წარმომადგენლები თინა ხიდაშელს გამგებლის ლობირებაში ადანაშაულებენ და ამასთანავე, იხსენებენ, რომ ლოლაძის მიმართ იყო აღძრული საქმე, რომელიც პროკურატურამ საეჭვოდ შეწყვიტა.

აღნიშნულზე ჟურნალისტური მოკვლევისათვის საგარეჯოში ჩასულ სოფო მთივლიშვილს (კახეთის საინფორმაციო ცენტრი) ხელი შეუშალეს პროფესიული საქმიანობის განხორციელების დროს (დაუზიანეს კამერა).

 იმის გამო, რომ ამჟამად თინა ხიდაშელი ევროპაშია მივლინებით, დავუკავშირდით აღნიშნულ საკითხზე ხიდაშელის თანაშემწეს, ქალბატონ ნათია ქობალიას, რომელმაც აღნიშნულზე განაცხადა, რომ პროკურატურამ ლოლაძის მიმართ სამართლებრივი დევნა შეწყვიტა მისი უდანაშაულობის გამო, ხოლო ახლა დაწყებული გამგებლის საწინააღმდეგო აქციის ორგანიზატორები არიან ის ადამიანები, რომლებმაც ვერ მიიღეს თანამდებობები.

 

 

 

'.$TEXT['print'].'
სხვა ამბები
ბოლოს იხილეს
დამზადებულია Pro-Service -ის მიერ
© PSnews 1995 - 2020 საავტორო უფლებები დაცულია