არჩილ კბილაშვილი: „ჩემი თანამდებობაზე მოსვლა იყო ნაადრევი“
საქართველოს მთავარი პროკურორი პრეზიდენტის ინაუგურაციის შემდეგ თანამდებობას დატოვებს. არჩილ კბილაშვილი თანამდებობას ტოვებს და ბიძინა ივანიშვილის მსგავსად, სამოქალაქო სექტორში გადადის. მთავარი პროკურორი თვლის, რომ მისი თანამდებობაზე მოსვლა ნაადრევი იყო და მას ორხელისუფლებიანობის დროს მოუწია მთავარი პროკურორის თანამდებობაზე მუშაობა. „ნაციონალური მოძრაობის“ გენერალურმა მდივანმა ვანო მერაბიშვილმა კი კბილაშვილის წასვლა ციდიხან ამგვარად შეაფასა - „მავრმა თავისი საქმე გააკეთა, მავრს შეუძლია წავიდეს...“
არჩილ კბილაშვილის განცხადებით, მასსა და მომავალ პრემიერ-მინისტრს შორის არანაირი უთანხმოება არ არსებობს და მისი თანამდებობიდან წასვლა ამას არ უკავშირდება. ყოფილი ადვოკატი და მოქმედი მთავარი პროკურორი ფიქრობს, რომ მისი თანამდებობაზე მოსვლა ნაადრევი იყო.
„ვფიქრობ, რომ ჩემი თანამდებობაზე მოსვლა იყო ნაადრევი, რადგან წინა რეჟიმს, რომ მართლმსაჯულების კარი არ ამოეგმანა, არც პოლიტიკისკენ, არც თანამდებობისკენ გამხედავი არ ვიყავი, ყოველ შემთხვევაში, 41 წლის ასაკაში, როგორც ეს ჩემს სინამდვილეში მოხდა. თანამდებობაზე ყოფნა უდაოდ პრესტიჟია, თუმცა იგი ჩემთვის ღირებულებას არ წარმოადგენს,“ - განაცხადა კბილაშვილმა.
მთავარმა პროკურორმა არ უარყო, რომ პროკურატურის გარდაქმნასთან დაკავშირებით მისი და პრემიერ-მინისტრის მოსაზრებები ერთმანეთს არ ემთხვევა, მაგრამ მისი თქმით, ეს აზრთა სხვადასხვაობა შეეხება დროს და არა პრინციპს.
„პრემიერი, ისევე როგორც მე, ფიქრობს, რომ საქართველოში ევროპული ტიპის პროკურატურა უნდა შევქმნათ, ოღონდ მე შედარებით სწრაფი მოქმედებების მომხრე ვარ. ვნახოთ, დრო აჩვენებს, რამდენად ვცდებოდი,“ - განაცხადა არჩილ კბილაშვილმა.
მთავარმა პროკურორმა საგანგებო ბრიფინგზე ისიც აღნიშნა, რომ მისი საქმიანობის დრო საქართველოში ორხელისუფლებიანობის პერიოდს დაემთხვა და ბუნებრივია, რომ ის კოჰაბიტაციით განაწყენებული მოქალაქეების წყრომის ადრესატი იყო.
„პროკურატურის საქმიანობა იმ პოლიტიკით იყო ნასაზრდოები, რომელიც ხალხში კოჰაბიტაციის სახელით არის ცნობილი. ამიტომ ბუნებრივია ისიც, რომ ვარ კოჰაბიტაციით განაწყენებულ მოქალაქეთა წყრომის ადრესატიც, თუმცა ვთვლი, რომ პრემიერ ივანიშვილის მთავრობის პოლიტიკა, რომელიც სისხლის სამართლის სფეროში ზომიერებითა და დაბალანსებულობით გამოირჩეოდა, ერთადერთი სწორი პოლიტიკა იყო. აღნიშნული არ ნიშნავს, რომ ვერ ვხედავდი, ან მომწონდა ნაკლოვანებები, რაც პროკურატურის სისტემას მემკვიდრეობით აქვს მიღებული,“ - განაცხადა ჯერ კიდევ მოქმედმა მთავარმა პროკურორმა.
„მავრმა თავისი საქმე გააკეთა, მავრს შეუძლია წავიდეს...“
მთავარი პროკურორის თანამდებობიდან არჩილ კბილაშვილის გადადგომას სოციალურ ქსელ Facebook-ზე გამოქვეყნებული განცხადებით „ნაციონალური მოძრაობის“ გენერალური მდივანიც გამოეხმაურა.
„ამ ადამიანმა პროკურატურა ივანიშვილის პირადი შურისძიების ინსტრუმენტად აქცია. უკანასკნელი 1 წლის განმავლობაში პროკურატურა ივანიშვილის პირად დავალებებს ასრულებს, რაც გულისხმობს, პოლიტიკური ოპონენტების განადგურებას, ალტერნატიული აზრის მოსპობას, „ერთიანი ნაციონალური მოძრაობის“ დაშლას და მისი პოლიტიკური სივრციდან გაქრობას. ამავე დროს, კბილაშვილმა თავის თავზე აიღო მწამებელი ვლადიმერ ბედუკაძის პასუხისმგებლობიდან გათავისუფლება, რითაც „ქართულ ოცნებასთან“ ბედუკაძისა და მისი ჯგუფის თანამშრომლობა დაფარა. მისი საქმიანობა მოკლედ შეიძლება, შეფასდეს - რომ იგი იყო ოპონენტების ჯალათი და ჯალათების ადვოკატი. მავრმა თავისი საქმე გააკეთა, მავრს შეუძლია, წავიდეს,“ - აცხადებს ვანო მერაბიშვილი.
კბილაშვილის გადადგომას „ქართულ საზოგდოებას“ ულოცავს პარტია „თავისუფალი საქართველოს“ თავმჯდომარე და თბილისის საკრებულოს წევრი კახა კუკავა, რომელიც ამ ფაქტს ჯერ არდანიშნული პრემიერ-მინისტრის დამსახურებად მიიჩნევს.
„ქართულ საზოგადოებას ვულოცავ, რომ კბილაშვილი პროკურატურას მოშორდა. მინდა, მადლობა გადავუხადო ახალ პრემიერს, რომელიც ჯერ არ არის დამტკიცებული, მაგრამ გასაგებია, რომ ეს მისი გადაწყვეტილებაა. ღარიბაშვილმა ძალიან კარგად დაიწყო და კარგი იქნება, თუ პროკურატურაში დარჩენილ კბილაშვილის კუდებს იქიდან მოაშორებს და პროკურატურა ჩადგება ქართველი ხალხის სამსახურში,“ - განაცხადა კახა კუკავამ.
საპარლამენტო უმრავლესობის წევრის გიორგი ცაგარეიშვილის თქმით, არჩილ კბილაშვილის თანამდებობიდან გადადგომა მისთვის მოულოდნელი არ ყოფილა. დეპუტატი ამბობს, რომ მას ბევრი რამ პროკურატურის მუშაობაში არ აკმაყოფილებდა.
„რომ გითხრათ, რომ არ ველოდი გარდაქმნებს პროკურატურაში, ნამდვილად მოგატყუებთ. მე, როგორც „ქართული ოცნების“ წარმომადგენელს, ადამიანს, რომელიც სამართლიანობის აღდგენის ლოზუნგით გამოდიოდა ამომრჩევლის წინაშე, ბევრი რამ პროკურატურის მუშაობაში არ მაკმაყოფილებდა, მათ შორის, გამოძიების ტემპი,“ - განაცხადა ცაგარეიშვილმა.
მთავარი პროკურორის პოსტიდან არჩილ კბილაშვილის წასვლას გამოეხმაურა „ქრისტიან-დემოკრატიული მოძრაობის“ ლიდერი გიორგი თარგამაძეც. მისი თქმით, პიროვნული თვისებებიდან გამომდინარე, არჩილ კბილაშვილი ამ თანამდებობაზე სრულიად არაადეკვატურ გარემოში იყო.
„ერთი წლის განმავლობაში 7 ნოემბრის მოვლენებთან დაკავშირებით გამოძიებამ, ფაქტობრივად, წინ ვერ წაიწია და მე, მაგალითად, ამდენი ხნის განმავლობაში არც კი დავუკითხივარ. პრეტენზიებიც ბევრი გვქონდა, თუმცა პიროვნული თვალსაზრისით შემიძლია ვთქვა, რომ ეს ადამიანი თავისი პატიოსნებით და ადამიანური თვისებებიდან გამომდინარე იმ გარემოში სრულიად არაადეკვატური იყო, რასაც დღეს ეს სისტემა წარმოადგენს,“ - განაცხადა თარგამაძემ.
მთავარი პროკურორობა ურთულეს პერიოდში...
„მას ძალიან რთულ პერიოდში მოუწია პროკურორობა. მისი მუშაობა არ იყო იდეალური, თუმცა ასე თუ ისე მან მაინც ღირსეულად გაართვა თავი თავის მოვალეობებს. არ გადაუხვია სამართლებრივ გზას და „ნაციონალური მოძრაობის“ წინააღმდეგ მასობრივი რეპრესიები არ დაიწყო, რისი მოლოდინიც საზოგადოების დიდ ნაწილს ჰქონდა. სწორედ, ამის გამო, მისი უწყების მიმართ ბოლო დროს ძალიან ბევრი პრეტენზია გაჩნდა, ამიტომ მიმაჩნია, რომ მან სწორი გადაწყვეტილება მიიღო,“ - განაცხადა საქართველოს პარლამენტის თავმჯდომარის თანაშემწემ და რესპუბლიკური პარტიის ერთ-ერთმა ლიდერმა დავით ზურაბიშვილმა კბილაშვილის გადადგომის შეფასებისას.
„საქართველოს ახალაგზარდა იურისტთა ასოციაციის“ (საია) თავმჯდომარე კახა კოჟორიძე მიიჩნევს, რომ არჩილ კბილაშვილს პროკურორის პოსტზე მუშაობა ძალიან რთულ პერიოდში მოუწია და მის ერთ-ერთ მთავარ მიღწევად პროკურატურის ლიბერალიზაცია მიაჩნია.
„არჩილ კბილაშვილს მოუწია ძალიან რთულ პერიოდში მთავარი პროკურორის უფლებამოვალეობის შესრულება. მე იმას ვგულისხმობ, რომ როდესაც ის მთავარ პროკურორად დაინიშნა, პროკურატურას რამდენიმე ათასი ადამიანი მიაწყდა, რომლებმაც შეიტანეს განცხადებები, სადაც საუბარი იყო წინა ხელისუფლების დროს ჩადენილ მძიმე დანაშაულებებზე,“ - განაცხადა კოჟორიძემ.
საია-ს თავმჯდომარე მიიჩნევს, რომ მთავარი პროკურორის შეფასებისას უნდა გავითვალისწინოთ ის რეალობა, რომელშიც მას თავისი ფუნქციის შესრულება მოუწია. იმ პერიოდში, როცა მან მუშაობა დაიწყო, პროკურატურის იმიჯი შელახული იყო და ადამიანები მას აღიქვამდნენ არა როგორც სამართალდამცავ, არამედ როგორც სამართალდამრღვევ ორგანოდ.
ყველაფერი ეს ახალ პროკურორს მძიმე ტვირთად დააწვა. კოჟორიძის განცხადებით, ასევე, იგრძნობოდა, რომ პროკურატურა შსს-ს გავლენის ქვეშ იყო.
„თუმცა, მისი ბევრი ქმედება კრიტიკას მაინც იმსახურებს. ხშირ შემთხვევაში მისი გადაწყვეტილებები არ იყო პრინციპული და შსს-ს გავლენის ქვეშ ექცეოდა. ასევე საზოგადოებას არ ჰქონდა ინფორმაცია იმის შესახებ, მიმდინარეობდა თუ არა გამოძიება ბევრ გახმაურებულ საქმეზე. მხოლოდ ვანო მერაბიშვილის პასუხისგებაში მიცემა კი არ არის ის რეაგირება, რომელიც სამართალდამცავმა ორგანოებმა 26 მაისის მოვლენებზე უნდა მოახდინონ,“ - მიიჩნევს კახა კოჟორიძე.
პროკურატურა შსს-ს დანამატი შეიძლება გახდეს...
არჩილ კბილაშვილის განცხადების შემდეგ ირაკლი ღარიბაშვილმა, რომელიც ბიძინა ივანიშვილის შემდეგ პრემიერ-მინისტრი უნდა იყოს, თავისი კანდიდატურა უკვე დაასახელა. ეს არის ოთარ ფარცხალაძე, რომელიც ამჟამად ფინანსთა სამინისტროს საგამოძიებო სამსახურის უფროსია. საპარლამენტო ოპოზიციის „ნაციონალური მოძრაობის“ ლიდერების განცხადებით კი ეს ნიშნავს, რომ პროკურატურა შინაგან საქმეთა სამინისტროს დანამატი იქნება და არა მაკონტროლებელი.
„რამდენიმე თვის წინ ირაკლი ღარიბაშვილმა კბილაშვილის მაკონტროლებლად, მის მოადგილედ გაბიტაშვილი დანიშნა. ამ მექანიზმმა ჯეროვნად ვერ იმუშავა და დღეს უკვე ფარცხალაძე, ღარიბაშვილის კადრი, მთავარ პროკურორად ინიშნება. ეს ერთადერთ რაღაცას ნიშნავს, რომ პროკურატურა, როგორც ბუნებით არის მაკონტროლებელი შს სამინისტროსი, ამ ფუნქციას ვეღარ შეასრულებს და ის გახდება უბრალოდ შს სამინისტროს დანამატი. ამ ტენდენციაზე, თუნდაც ის მიუთითებს, რომ ინფორმაცია ახალი მთავარი პროკურორის შესახებ შს მინისტრის პრესსამსახურმა გაავრცელა და არა იუსტიციის მინისტრმა, რაც ბუნებრივი იქნებოდა. ყველამ ვიცით ვინ არის ფარცხალაძე. ის ავტორია იმ გახმაურებული სპეცოპერაციისა, როდესაც საქართველოში იყო რასმუსენი, მას თბილისიდან წასვლაც არ აცალეს, საკრებულოს 22 წევრი და გამგებელი დაიჭირეს, ხურვალეთის ქუჩებში ასეირნეს, დაკითხვაზე მიიყვანეს, გამოუშვეს და მერე ისევ დაიჭირეს. ასე რომ, მის პოლიტიკურ ალღოზე, შეუძლია საზოგადოებამ თავად იმსჯელოს,“ - განაცხადა საპარლამენტო უმცირესობის წევრმა ირმა ნადირაშვილმა.
როგორც უმცირესობის წარმომადგენელი სერგო რატიანი აცხადებს, „ბიძინა ივანიშვილის მხრიდან მერიის თანამშრომლების წინააღმდეგ განხორციელებული ქმედებები სამარცხვინო ფურცელი იყო“.
„ამ ადამიანმა თავი დაგვამახსოვრა მერიის თანამშრომლების წინააღმდეგ განხორციელებული ქმედებებით. ეს იყო ბიძინა ივანიშვილის მხრიდან ყველაზე სამარცხვინო ფურცელი და არ უნდა გაგვიკვირდეს ის, რომ სწორედ მომავალი პრემიერის პოლიტიკური გემოვნება ამ ადამიანზე შეჩერდა,“ - განაცხადა რატიანმა.
ირაკლი ღარიბაშვილი კი საზოგადოებას ჰპირდება, რომ მომავალი მთავარი პროკურორი კარგი და ეფექტური იქნება, ამის შესახებ მოქმედმა შს მინისტრმა და მომავალმა პრემიერმა ირაკლი ღარიბაშვილმა ჟურნალისტებს საგურამოში განუცხადა. მისი თქმით, ფარცხალაძეს ეყოლება ძალიან ეფექტური გუნდი, რომელიც დაკომპლექტებული იქნება ახალგაზრდებით და გამოცდილი პროკურორებით.