დაიბადა 1965 წლის 21 თებერვალს ქ. ზესტაფონში. 1982 წელს დაამთავრა არგვეთის საჯარო სკოლა. 1988 წელს სასოფლო სამეურნეო ინსტიტუტის მევენახეობა-მეღვინეობის ფაკულტეტი, მეღვინეობის ტექნოლოგიის სპეციალობით. 1995 წელს – საქართველოს აგრარული უნივერსიტეტის სამართალმცოდნეობის ფაკულტეტი. 1988-1998 წლებში მუშაობდა თბილისის შამპანურის ქარხანაში ინჟინერ ტექნოლოგად; 1998-1999 წლებში იყო ხაშურის ძეხვეულისა და ნაყინის ქარხნის დირექტორი; 1999-2003 წლებში ეკავა საქართველოს საპატრიარქოს „ხაშმის“ ღვინის ქარხნის დირექტორის თანამდებობა; 2003-2011 წლებში იყო საპატრიარქოს აგროსამრეწველო დეპარტამენტის ხელმძღვანელი; 2009-2010 წლებში საპატრიარქოს წარმომადგენელი სამთავრობო კომისიის წევრი; 2011 წლიდან კვლავ საქართველოს საპატრიარქოს „ხაშმის“ ღვინის ქარხნის დირექტორია; ფლობს რუსულ ენას; ჰყავს მეუღლე და სამი შვილი.
„ნუ ნერვიულობ, უფლის ნებით, ყველაფერი კარგად იქნება, მე შენს შესაძლობებში ეჭვი არ მეპარება" - ასე მისცა პოლიტიკაში ჩართვის კურთხევა „ქართული ოცნების" ზესტაფონის მერობის კანდიტას, კახაბერ მახათაძეს უწმინდესმა.
ადგილობრივი თვითმმართველობის არჩევნებში გამარჯვების შედეგად, ბატონი კახაბერ მახათაძე უკვე ზესტაფონის მერია და სჯერა, რომ ზესტაფონის ისტორიაში მისი სახელი და გვარი ოქროს ასოებით ჩაიწერება.
ჩვენი ამჟამინდელი ინტერვიუს მთავარი მიზანია,საზოგადოებას გავაცნოთ,ბატონიკახა მახათაძის წარსული, მისი ოჯახი თუ დღემდე გაკეთებული საქმეები.
დიალოგი
- ბატონო კახა, ბაბუათქვენი ცნობილი ექიმი იყო, ოჯახში არ სცადეს, რომ თქვენც მისი პროფესია აგერჩიათ?
- ზესტაფონში, მშრომელი ხალხის ოჯახში გავიზარდე. მამა ინჟინერი იყო, დედა - აგრონომი. ბებია-ბაბუაც ზესტაფონში ცხოვრობდა და ბაბუას, ოთარ გორგაძეს, ყველა იცნობდა - წლების განმავლობაში ზესტაფონის პოლიკლინიკის მთავარი ექიმი გახლდათ. ნამდვილად იყო მცდელობა, ექიმი გამოვსულიყავი, მაგრამ ჩემი ბუნებიდან გამომდინარე, ვფიქრობდი, რომ ჩემგან კარგი ექიმი არ დადგებოდა. მე ყოველთვის მინდოდა, მეღვინე ვყოფილიყავი, საკმაოდ დიდხანს ვმალავდი ჩემს გადაწყვეტილებას. საბოლოოდ, ოჯახიც შეეგუა, როცა სასოფლო სამეურნეო ინსტიტუტში ჩავაბარე. თავად მამა ინჟინერი იყო, დედა კი არგონომი, მშრომელი.
- ბატონო კახა, სოფლის მეუნეობის მხარდამჭერ პროგრამებს როგორ აფასებთ და რამდენად უწყობს ისინი ხელს სხვადასხვა დარგის დანვითარებას?
- ხელისუფლებამ ამ მიმართულებით უმნიშვნელოვანესი რეფორმა გაატარა. კარგი საქმე კეთდება. სხვათაშორის, ამ სფეროს მიმართ მთავრობის ასეთმა დამოკიდებულებამ გადაგვაწყვეტინა ძველ მეგობრებს, ჩამოგვეყალიბებინა კომპანია, რომელიც დღეს ღვინის მწარმოებელი კომპანიების სამეულშია.
- ღვინის ქარხნის მართვის საკმაოდ დიდი გამოცდილება გქონდათ. წლების წინ, ხაშმის ღვინის ქარხნის დირექტორად ვისი გადაწყვეტილებით დაინიშნეთ?
- უწმინდესის. ხაშმის ღვინის ქარხანაში 1999 წლიდან ვიმუშავე. როცა ეს შეთავაზება მივიღე, შამპანურის ქარხანაში ვმუშაობდი და, სიმართლე გითხრათ, წამოსვლას არ ვაპირებდი. თუმცა, რა თქმა უნდა, საპატრიარქოში შეხვედრაზე წავედი. მაშინ საფინანსო ეკონომიკური საბჭოს თავმჯდომარე მამა ზენონი იყო, რომელიც დღეს უკვე მთავარეპისკოპოსია, ჯერ მას გავესაუბრე, შემდეგ კი უწმინდესთან შევედით. მაშინ პატრიარქი პირველად ვნახე და ისე დავიბენი, რა უნდა გამეკეთებინა, არ ვიცოდი. 5 წუთში ჩემს შესახებ ყველაფრის გამოკითხვა მოასწრო, ბოლოს წამოდგა და მამა ზენონს უთხრა, ამ ადამიანზე დაწერეთ ბრძანება და დანიშნეთ ხაშმის ღვინის ქარხნის დირექტორად!“. ჩემს გაოცებას საზღვარი არ ჰქონდა. მადლობა უფალს, რომ ასე გადაწყდა ყველაფერი.
- ამის შემდეგ უწმინდესთან შეხვედრა ხშირად გიწევდათ?
- ამის შემდეგ, ერთი წლის განმავლობაში, ალბათ, მხოლოდ 3-4-ჯერ შევხვდით. მახსოვს, ერთხელ, უცხოეთიდან ბრუნდებოდა და აეროპორტში დავხვდი.ჩემთან ერთად უამრავი ადამიანი იყო. უწმინდესი გამოემართა პირდაპირ ჩემსკენ, თვალებში შემომხედა და მკითხა: „როგორ ბრძანდებით?" ვერც ამჯერად მივხვდი, როგორ უნდა მოვქცეულიყავი. არც კი მახსოვს, რა ვუპასუხე, იმდენად არ ველოდი მის უშუალო დამოკიდებულებას. ხელზე ვემთხვიე და მოვიკითხე. იმის შემდეგ ხშირად მიბარებდა საპატრიარქოში. მოგვიანებით, გადმომიყვანა კიდეც სამუშაოდ და აგრომიმართულება ჩამაბარა. მაშინ არც დაცვა ჰყავდა. მე და 2-3 სასულიერო პირი ვიყავით მუდმივად. ისეთი შემთხვევაც ყოფილა, ხალიჩაზეც გვძინებია. მახსოვს, დილას, 6 საათზე გამოვიდოდა ხოლმე უწმინდესი და დაგვიძახებდა: „ლოცვა!" და ჩვენც ვლოცულობდით. რაც შეგვეძლო, სოფლის მეურნეობა განვავითარეთ, ძალიან ბევრი ხალხი დავასაქმეთ, აღვადგინეთ რამდენიმე ფერმა, თევზსაშენი. ბევრი მიწა დამუშავდა ამ ხელისუფლების მოსვლის შემდეგ, პროგრამები ამოქმედდა და საპატრიარქოც ჩაერთო პროცესებში. ამდენი მოხნული მიწა, რაც 2012 წლის მერე ვნახე, მანამდე არ მენახა. სოფლის მეურნეობის ძალიან ბევრი პროდუქტი მოგვყავდა. ეს მოსავალი, ძირითადად, მონასტრებს ურიგდებოდა და საპატრიარქოს მაღაზიებშიც შედიოდა.
- და ამ მშვიდი, მადლიანი საქმის კეთებისას, პოლიტიკით რატომ დაინტერესდით?
- საპატრიარქოში სამთავრობო კომისიის წევრი ვიყავი, სადაც 12-13 კაცი იყო და მათგან, საერო პირი მხოლოდ მე გახლდით. სახელმწიფოსთან ურთიერთობა, ძირითადად, მე მევალებოდა. უმეტესად, საქმე საპატრიარქოსთვის ქონების გადმოცემას ეხებოდა და, სხვათაშორის, ხშირად ამ საკითხით რომ მანიპულირებენ, ეს ასე იოლად არ ხდებოდა. ძალიან დავაც გვქონდა. მარტივად არ აკმაყოფილებდნენ ჩვენს მოთხოვნებს. რაც შეეხება პოლიტიკას, 2011 წელს ყველანი ვგრძნობდით, რომ მართლაც ცვლილების დრო იყო. მადლობა უფალს, ასე მოხდა და კარგად დასრულდა ყველაფერი. დიდი იმედიც გამიჩნდა, რომ ჩვენი ქვეყანა ივლის სწორი გზით და იქნება წარმატებული. თუმცა ეს შემოთავაზება, კენჭი მეყარა ზესტაფონის მუნიციპალიტეტის მერობისთვის, ნამდვილად მოულოდნელი იყო.
- გადაწყვეტილების მიღებაში უწმინდესიც ხომ არ დაგხმარებიათ?
- სიმართლე გითხრათ, როცა შემოთავაზება მივიღე, პასუხი არ მითქვამს, დრო ვითხოვე. უწმინდესი თბილიში არ ბრძანდებოდა. აუცილებლად უნდა მენახა. მით- უმეტეს, ადრეც იყო რამდენიმე შემოთავაზება და უწმინდესმა ბევრჯერ უარი მითხრა. მეუბნებოდა: „სადაც ხარ, შესანიშნავად ასრულებ შენს საქმესო!" ჩემი ოჯახის წევრები ფიქრობდნენ, რომ ამჯერადაც იგივეს გაიმეორებდა. დილით ჩავფრინდი უწმინდესთან, ვუთხარი, ძალიან ვნერვიულობ, ასეთი შემოთავაზება მივიღე-მეთქი. კონკრეტულად რა თანამდებობაზეა საუბარიო, მკითხა: „მე შენს შესაძლობებში ეჭვი არ მეპარება და ღვთის შეწევნით, ყველაფერი კარგად იქნება!"
- უწმინდესის კურთხევით, რა კარგი საქმეების გაკეთებას გეგმავთ ზესტაფონში?
- ვიღებ უდიდეს პასუხისმგებლობას იმ ხალხის წინაშე, ვისთან ერთადაც გავიზარდე. მათი გულისტკივილი, პრობლემები და გამოწვევები კარგად ვიცი. ზესტაფონში არაერთი ინფრასტრუქტურული პროექტია დაწყებული. მათ აუცილებლად ბოლომდე მივიყვან. დასრულდება სოფლების გაზიფიცირება. რამდენიმე სოფლის გზაა მოსაწესრიგებელი. ზესტაფონის მუნიციპალიტეტში დასაქმებაა დიდი პრობლემა. აქ სამუშაო ადგილების დიდი რესურსია. განსაკუთრებულ ყურადღებას მივაქცევ სოფლის მეურნეობას. მზად ვარ ერთი რამისთვის - რაც შეიძლება მეტი გავაკეთო ჩემი მუნიციპალიტეტისთვის. ჩემს ყველა რესურსს გამოვიყენებ, რათა ზესტაფონის ისტორიაში ოქროს ასოებით ჩავეწერო.
მახათაძეების დიდი ოჯახის 33-წლისნი ისტორია
ზესტაფონის მერის, ბატონ კახა მახათაძის ყველაზე დიდი გულშემატკივარი მისი მეუღლე, ქალბატონი ნატო შავლაყაძეა, რომელიც დღეს „ძალადობისაგან დაცვის ეროვნულ ცენტრს“ ხელმძღვანელობს. 33-წლიანი თანაცხოვრების მთავარი საიდუმლო სიყვარულია. ერთმანეთი უნივერსიტეტში გაიცნეს მაშინ, როცა ბატონი კახა მეღვინეობას ეუფლებოდა, ქალბატონი ნატო კი – დაკონსერვების ტექნოლოგიას.
ჯგუფელები იყვნენ და ბატონმა კახამ პირველივე დღეს შეიტყო, რომ ნატო მძლეოსნობაში საქართველოს პირველი ოლიმპიური ჩემპიონის, რობერტ შავლაყაძის ნებიერა ქალიშვილი იყო. პირველი კურსის დახურვის შემდეგ შეყვარებულმა წყვილმა დრო იხელთა და მაშინ, როცა სასოფლო-სამეურნეო ინსტიტუტის ფიზაღრდის კათედრის გამგე დასასვენებლად წავიდა, ოჯახის შექმნა გადაწყვიტეს და „გაიპარნენ“. სხვათაშორის, ამ ამბავს ერთი ისტორიაც ერთვის, რომლის გახსენებისას, დღესაც გულიანად ეცინებათ – ქალბატონი ნატოს დედა სვანია, თამარ კვიციანი, პროფესიით ექიმი, დაირაზმნენ კვიციანები ბატონ რობერტთან, რომ ქალიშვილის გაპარვის ამბავი შეატყობინონ. მისვლისთანავე, ნატო აღარ გვყავსო, მიახალეს. მუხლი მოეკვეთა ბატონ რობერტს და სისხლი გაეყინა, სანამ აუხსნეს, რომ სინამდვილეში ნატოს გაპარვაზე იყო საბურაი. ამ ამბავს ზესტაფონელი ახალგაზრდა ბიჭისთვის, რომელმაც გაბედა და შავლაყაძის ქალიშვილი „გაიტაცა“, ალბათ, დადებითი მხარეც ჰქონდა – ბატონი რობერტი ისე აღარ განრისხდა, როგორც ელოდნენ. სხვათაშორის, რამდენიმე თვის წინ ცნობილი გახდა, რომ გამოკითხვით, დიდუბის მოსახლეობამ, 2017 წლის ყველაზე სასახელო პიროვნებად სწორედ რობერტ შავლაყაძე დაასახელა.
მახათაძეების წყვილს 3 ვაჟი ჰყავს. უფროსი, 32 წლის გიგი, ტელეოპერატორი, ტელერეჟისორი და იურისტია. 14 წლიდან სხვადასხვა ტელევიზიაში მუშაობს და მე-9 არხის შექმნაშიც დიდი წვლილი მიუძღვის. გიგის მეუღლე – ნინო კვირკველია ექიმია, წყვილს 1 შვილი ჰყავთ; მეორე ვაჟი, 25 წლის თორნიკე, ბიზნესის მართვის სპეციალობას დაეუფლა და მამის ერთ-ერთი კომპანიის ხელმძღვანელია. თორნიკეც დაოჯახებულია და ქეთევან კილტავასთან ერთად 2 წლის შვილს, პატარა კახაბერ მახათაძეს ზრდის. მესამე ვაჟი 17 წლისაა და აბიტურიენტია.
ბატონი კახა საუბრისას გამოგვიტყდა, რომ მამის გადაწყვეტილება გიორგის ყველაზე ნაკლებად ესიამოვნა, რადგან ზესტაფოში იქნება და ოჯახისთვის ნაკლები დრო დარჩება. უფროსი შვილი გიორგი, 6 წლამდე ზესტაფონში იზრდებოდა, ბებია-ბაბუასთან. მახათაძეების ოჯახს ზესტაფონთან კავშირი არასოდეს გაუწყვეტია. გიორგის განსაკუთრებით უყვარს აქაურობა. უამრავი მეგობარი და ნაცნობი ჰყავს. დარწმუნებულია, 4 წლის შემდეგ თითოეული მათგანი ეტყვის, რომ ზესტაფონი არ შეცდა, მუნიციპალიტეტის მერის პორტფელი კახა მახათაძეს რომ ანდო.
ეკატერინე დუგლაძე