მოგზაურთა და ექსტრემალისტთა კლუბმა „თეთნულდმა”, ქუთაისში, „თი ბი სი“ ბანკის საგამოფენო დარბაზში ფოტოგამოფენა მოაწყო სახელწოდებით „სხვა საქართველო“.
2017 წელს კლუბ „თეთნულდის” 5 კაციანი ჯგუფი ირანში იმყოფებოდა, სადაც ფერეიდანში მცხოვრებ ქართველებს სტუმრობდნენ. მათ ადგილობრივ მთასვლელთა კლუბ „შაჰან კუჰთან“ ერთად, დალაშქრეს მწვერვალი „შაჰან კუ“, მწვერვალი „მთაციხე“ და მოინახულეს მარაბჯანის უდაბნო. გამოფენაზე სწორედ ამ მოგზაურობის ამსახველი ფოტომასალა იყო წარმოდგენილი.
მოგზაურობისას მიღებული ემოციებისა და შთაბეჭდილებების შესახებ გვესაუბრა აჩიკო გეგენავა, კლუბ „თეთნულდის“ წევრი, ფოტოგრაფი:
„ეს გამოფენა ეძღვნება ფერეიდანში ქართველების გადასახლების 400 წლის თავს. საკმაოდ მნიშვნელოვანი ფოტომასალა ჩამოვიტანეთ და ექსპედიციაც საინტერესო გამოდგა. პირველი ქართველები ვიყავით, ვინც ამ მწვერვალზე დადგა ფეხი“.
შეგახსენებთ, კლუბი „თეთნულდი“ წარმოადგენს არასამეწარმეო-არაკომერციულ იურდიულ პირს, რომლის მიზანია საქართველოში მთასვლელობის, სპალეო ტურიზმის და სამთო სპორტის პოპულარიზაცია-განვითარება. ასევე - დაინტერესებული ახალგაზრდების შეკრება, მათთვის თეორიული და პრაქტკული გამოცდილების გაზიარება, მთაში გადაადგილებისა და ბუნებრივი რესურსების გამოყენების სფეროში.