2014 წლის 11 აპრილის ჩათვლით, პროფესიული განათლების მიღების მსურველთა რეგისტრაცია მიმდინარეობს. 3 აპრილს საქართველოს განათლებისა და მეცნიერების მინისტრის პირველი მოადგილე ქეთევან ნატრიაშვილი და იმერეთის გუბერნატორი ზაზა მეფარიშვილი ქუთაისის პროფესიულ კოლეჯ „იბერიას“ ეწვივნენ  რეგისტრაციის პროცესის მიმდინარეობას გაეცნენ და სასწავლებელი დაათვალიერეს.

პროფესიულ პროგრამებზე რეგისტრაცია მიმდინარე წლის 21 მარტიდან მიმდინარეობს საქართველოს მასშტაბით არსებულ თბილისის, ქუთაისისა და ქობულეთის საინფორმაციო ცენტრებში, საგანმანათლებლო რესურსცენტრებსა და პროფესიული  პროგრამების განმახორციელებელ დაწესებულებებში.

ორი აპრილის მონაცემებით საზოგადოებრივ კოლეჯ „იბერიაში“ საგაზაფხულო მიღებისთვის  200-ზე მეტი აპლიკანტია დარეგისტრირებული. კოლეჯში მისაღები ადგილების რაოდენობა 660-ია. ამჟამად, კოლეჯში  609 პროფესიული სტუდენტი სწავლობს შემდეგ სპეციალობებზე: მზარეული, კონდიტერი, მემცენარე, მეფუტკრე, სასტუმრო, სარესტორნო საქმის მწარმოებელი, ელექტრიკოსი, მღებავი, მეფილე-მომპირკეთებელი, თაბაშირ-მუყაოს სპეციალისტი, ზეინკალ-სანტექნიკოსი, სავალი ნაწილის ტექნიკოსი, ძრავის შემკეთებელი, ავტომობილის ზეინკალი, კალატოზი, დურგალი, შემდუღებელი, გაზმომარაგების სისტემის მემონტაჟე, სამკერვალო ნაწარმის სპეციალისტი, სამაცივრო მოწყობილობების ტექნიკოსი, სტილისტი, ბუღალტერი, კომპიუტერული გრაფიკოსი, ოფისის მენეჯერი (მდივან-რეფერენტი).

საგაზაფხულო მიღებაზე ყველა დაინტერესებულ პირს ეძლევა შესაძლებლობა  დარეგისტრირდეს და სახელმწიფო დაფინანსებით დაეუფლოს მისთვის სასურველ პროფესიას სახელმწიფოს მიერ დაფუძნებულ 24 საგანმანათლებლო დაწესებულებაში, რომლებიც  პროფესიულ პროგრამებს ახორციელებენ. პროგრამის ხანგრძლივობა განსაზღვრულია შესაბამისი პროფესიული სტანდარტით.

სასწავლებლები აღჭურვილია განახლებული ინფრასტრუქტურითა და თანამედროვე მატერიალურ-ტექნიკური ბაზით, დაკომპლექტებულია კვალიფიციური და გადამზადებული პედაგოგებით, რაც წამყვან ორგანიზაციებში პრაქტიკული კომპონენტის ათვისების საფუძველზე,  ყველა მსურველს მისცემს საშუალებას გახდეს კონკრეტული დარგის პროფესიონალი და დასაქმდეს. 

psnews.ge